منظر جميل من قديمات الأزمان ذكرى الجدود اللي على البال غالين

ثلاثة أبواب على طور الأجداد
ما ينفتح بابٍ بليا مفاتيح
أظنها ديكور من عصر شداد
لابد ما تفنى مع الوقت وتطيح
من فوقها خشب كما وضع الأوتاد
أثر عليها لا هب النّار تلفيح
علي الرشيد - رياض الخبراء
يا داروين اللي سكن في مبانيك
اليوم باقي ذكرهم فوق الاطلال
لك صورةٍ بانت وبانت معانيك
ثلاث طاقاتٍ لهن ذوق وأشكال
ويا بيت والله ما تعدد حسانيك
في ماضي الامجاد ذكرك ولازال
يوم النخل يوم التوابع سوانيك
وقتٍ قديم ماضيٍ عصر الابطال
حمد عبدالله الوايلي - حوطة سدير
منظر جميل من قديمات الأزمان
ذكرى الجدود اللي على البال غالين
بايامهم تلقى الوفاء دوم عنوان
طبيعةٍ لاجدادنا دوم وافين
يا مالهم فضلٍ علينا لهم شان
وعسى مثواهم جنة الخلد آمين
انا أشهد إن القلب لاشك ولهان
الصبر عادتهم على الخير ساعين
محمد عبدالعزيز الخنيفر - أشيقر
هذي درايش دراهم والمرازيب
سنّة حياة أقفت بهم والأثر باقي
أهل الديانة والكرم .. والتراحيب
والسيرة العطرة مع المعدن الراقي
حياتهم رغم العوز نبضها طيب
ونيّاتهم منها السّما غيم برّاقي
سعود عائش الحربي - جدة
الله وأكبر قفت بيوتنا الطين
ما عاد منها غير ذكرى الزماني
درايشٍ في شوفها تدمع العين
كل من نظرها أشتاق ذاك المكاني
قصورٍ بنوها من حموا هامة الدين
أجدادنا اللي سطروا فخر المعاني
خالد ناصر المخيمر - روضة سدير
اختيارٍ طيّبن ماله مثيل
ذكرتنا أجدادنا ذيك العصور
يا حلو المنظر ترى مثله قليل
والتراث اليوم أصبح له حضور
ومن بدا يحييه هو رجلٍ اصيل
دار جدك أصبح اليوم معمور
والدرايش تعجبك صارت دليل
يا زينها هموا بها قبل الدثور
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (مرسلة من / عبدالكريم بن خزيم)
Your browser does not support the video tag.