بلاد نهجها الدين القويم

يالله تخزي كل شيطان رجيم
وتذلّله وتذلل اتباعه معه
وتحفظ بلاد نهجها الدين القويم
وفيها الاذان بكل فرضٍ نسمعه
وفيها حرم مكه وزمزم والحطيم
وفيها قبر نبيّك اللي نتبعه
سليمة المبدأ ومنشاها سليم
والحق يصدح في الجهات الاربعه
فأرجاءها ماضاعت حقوق اليتيم
ولا شاف منها مايسيّل مدمعه
وللمسلمين تقدم الخير العميم
وعنهم تحاول كل شرٍ تمنعه
والشرع يقضي للخصيم من الخصيم
والظالم بنصّ الشريعه تردعه
مافرّقت بين المواطن والمقيم
في كل حق وكل خير ومنفعه
بلادنا وبلاد أهلنا من قديم
اللي حموها يوم كانت مقطعه
ياجعل مثواهم لجنات النعيم
نطلبك ياللي كل داعي تسمعه
واملاك اهلنا دونها البحر الطميم
والبحر مايدري عن اللي يبلعه
في حب قايدنا ودولتنا نهيم
والخوف بقلوب الاعادي نزرعه
اقوالنا ماتضرب الا في الصميم
وكف يبي يشر علينا نقطعه
وفي صدورنا علمٍ نقوله للغشيم
اللي شياطينه وراه وتدفعه
ما عندنا للمعتدي غير الجحيم
مير اسمعوا مازال حنا في السعه
قدام نروي سلة السيف الصريم
وسبع الخلا والطير منكم نشبعه
والحكم لله ثم حكم ابرك زعيم
ابو فهد والطيب كله منبعه
اللي ماجابن مثله بطون الحريم
الله معه والشعب بإذن الله معه