تباريح عشاق

وين أنت ..؟! يا زول (ن) له القلب خفاق
يا من على شوفه أسوق البشاير
يفداك قلب (ن) تحرقه نار الأشواق
ويفداك جرح وسط الأعماق غاير
يفداك خاطر دون طاريك ما فاق
وإن غاب تكبر من همومه صغاير
يا ما خيالك زارني وقت الإشراق
وياما الغروب اسكن بقلبي عباير
ياما غشت ليلي.. تباريح عشاق
وبيحت من وحشة فراقك سراير
بعدك وساع الكون في ناظري ضاق
وأجر ونة من عظامه كساير
لو الزمن يرحم ما به لحظة فراق
لكن زمانك بالمواصيل جاير
غيرك بقلبي يا منى العين ما لاق
لا والذي عالم بخافي الضماير
لا بد ما هنا بك وأصافحك بعناق
طبع الزمان وعارفه حيل داير
باجيك وامسح دمعة (ن) بين الأحداق
لو وقفوا دونك بوجهي عشاير ..!!