محاورة

محمد الجبرتي:
أرسلت لك مرسول والمرسول وافاني وقال
وش بك تلزّم فالحبال اللي رموث حبالها
أنته تقضي في شطونك وإلاّ أنا مشغول بال
مشغول بالي من برامجنا وحسن أمثالها
عبدالله المسعودي:
لو كان للطيّب مواري تظهره يا بن الحلال
يمديك تعرف طيّبين القوم قبل أفعالها
يا راعي الميزان ياللي قبل يوزن فيه مال
أشوف كِفّه ميّلت كِفّه ولا أدري مالها
محمد الجبرتي:
أنا ليا دقت هجوسي وإلتمس حالٍ بحال
أقضي علومٍ من ضميري ما تجيب بدالها
كم واحدٍ مثلك لبس له ثوب ومنكّس عقال
لكن ما يدري عن الديره وعن نَزّالها
عبدالله المسعودي:
كلٍّ يقول الحق عندي والله أولى بالكمال
وإن قلت هرجه شرهة الهرجه على من قالها
أحد يقلَّه روح وأحدْ يقال له روح وتعال
يالعود الأغشم لا تساوي روسها بأذيالها
محمد الجبرتي:
أنته يا ابن مستور لو إنّك صري من بعض حال
أسمك مخيله تطرح الجدران من زلزالها
وأنا ليا صكّت عليك رجال فرّقت الرجال
لكن قول الله يخلّي للرجال رجالها
عبدالله المسعودي:
يا ابن شريّف لا تعرّض للبوابير الثقال
خلّك لحالك والبوابير الثقال لحالها
يا خنجر الخدّاع ياللي من يمينه فالشمال
تهفي عن المقفي وترجع في نحر نقالها
محمد الجبرتي:
حنّا نبى نحمّلك وأنت اليوم ما فيك إحتمال
إلاّ الى سوّيت لك حيله نبا نحتالها
واليوم ساعة جاك يا ذيب الغنم ذيب الجمال
يفرح ليا منه لقيها فالشعيب لحالها
عبدالله المسعودي:
حمّلت أمانه والأمانه ما تحمّلها الجبال
إن صنتها لا باس وإن وكلت يموت أكّالها
الذيب مثل الذيب وأنته لا أنت ذيب ولا خيال
إكل عشاك وروح غادي والذياب إصحالها