شهر كتب صومه وفيه التباشير

حل رمضان وباكثر الناس تقصير
عسى الولي يغفر خطايا عباده
شهر كتب صومه وفيه التباشير
للمسلم اللي يجتهد فالعباده
شهر قدومه خير للي بغى الخير
ومن يجتهد يبلغ مناه ومراده
يلقى المرابح ما تجيه المخاسير
وتضفي عليه امن الليالي سعاده
قدم لنفسه ما اتجه للمعاذير
ماهوب مثل مكبرين الوساده
قصورهم ما له بلا شك تبرير
وصيامهم بين المخاليق عاده
تبطش جوارحهم وفي صومهم غير
واطيبهم امسك عن شرابه وزاده
أحدٍ حياته كلها نوم ويصير
عنده من اصناف المعاصي زياده
صابه تكاسل في صلاته وتاخير
ويحسب صيامه كامل باعتقاده
واحدٍ لسانه مثل وصف المناشير
يشذب ويسرج بالملاغي جواده
تعدد امورٍ تبي زود تحذير
وكلٍ حسب عرفه يزيد اجتهاده
ينبه الغافل بحسن التعابير
وحسن التعامل فيه كل الافاده
كلٍ يوجه يالوجيه المسافير
ولا خاب عبدٍ بالولي اعتماده
الله يدبرنا على خير تدبير
ويجعل خواتمنا بنطق الشهاده
وصلاة ربي عد ما رفرف الطير
واعداد ما هب النسيم وبراده
على نبي طهر الارض تطهير
عن كل ظلمٍ زاد واجلى سواده