ما عاد باقي للنوادر شرايد

هل فعلاً تدنّى مستوى الشعر؟ .. أم أنّ الأمر مجرَّد تخوُّف لدى البعض من حدوث ذلك .. تساؤلات كثيرة تطرحها هذه المقطوعة للشاعر ملفي الغيلاني، وربما كان هناك من يخالفه الرأي .. اقرؤوا هذه القصيدة بتمعُّن ولكم حق المعارضة أو التأييد:
قالوا جديدك قلت ما من جدايد
الشعر ما له تالي الوقت خانه
تورسلوه مخربين القصايد
وأصبح مجال الشعر علكة لبانه
طلاسمٍ بأسبابها الشعر بايد
ون طولت تقضي على عنفوانه
خف الجزيل وهابط الشعر سايد
والجزل شفت الهزل حل بمكانه
خص اليا طالعت بعض الجرايد
قنعت منه وقلت قفا زمانه
مافيه لأصحاب المواهب فوايد
من يوم كلٍ يسرج حصانه
بالمعرفة ناقص وبالجهل زايد
ولا كل من غاص البحر جاب دانه
واللي بنات أفكار هجسة فرايد
أعلن عزوفه عنه وأطلق عنانه
وعن ما يعكر صفو جوه محايد
ما عاد ينطق بالقصايد لسانه
لو كان في بدع التماثيل رايد
وتحس من نظم البيوت اتزانه
وتصخيرها بأسلوب ماهوب كايد
عنده مدى قدرة وعرف وتكانه
لكن شاف وعاف سوق المزايد
وأنا ما الومه لاحتفظ بالأمانة
واللوم ما يلحق وسيع البنايد
واليا اعتذر معذور من علو شانه
ما عاد باقي للنوادر شرايد
ون كان باقي شي يحسب ذنانه