يسوقه الغربي

بصمة

رجم طويل يبرح الخد شاهوق
رجم يوسع خاطري كل ما ضاق
من عقب مشرافي باسميه مرزوق
عساه نوّ يزعج السيل دفاق
ما هوب من عجل المعاصير مرفوق
نوّ ثقيل راسي له تفهاق
سيل على روس الغراميل مدفوق
يسوقه الغربي ولا هوب ينساق
ويرده الشرقي ولو كان مسيوق
لا فيه رعاد ولا فيه براق
وبل يهل من الهماليل برفوق
عقبه تشوف النبت كله بالأوراق
مدهم ويكسي عاري الخد من فوق
واليا مضى عشر وعشر على ساق
تشوف في بعض الدواوير زملوق
يفرح به اللي فيه يرعاه بنياق
واللي يبيله سجة مع هل النوق
يا محلا والعشب غاد به أرناق
صوت أم سالم بين عاشق ومعشوق
وشوف البيوت اللي بها قاطع أرواق
في صيهد ماشيه ما هوب مرهوق
لا جا الضحا من عقب حزات الاشراق
تجمعوا والبن يحمس ومدقوق
في ربعة يوجد بها كل الأرزاق
يجيبها اللي جارها الله من العوق
وياما حلا شوف الدبش عقب الاطلاق
ما ردد الطياح والحشو مفهوق
تلد له صفراً تمايح بالاشناق
صفراً كسوها بالمراير مع الطوق
صفراً خذت زين المغاتير وأعماق
ما وقفوها عند أبو ذيب بالسوق
وصا عليها اللي كريم بالأنفاق
بالبذل ما مثله مع الناس مخلوق
وعيا قليل الفود ما يصخي الناق
ويقول لو حطو لي الطاق مطبوق
أبغى ليا من حطوا العام سباق
أكون أنا السابق ولا نيب مسبوق
ذي منوة اللي للمظاهير يشتاق
يتبع هواه وتالي العمر ملحوق
عبد الهادي بن عبد الله بن راجس
عبد الهادي بن راجس