لا . . للإرهاب

دعانا الواجب اللي فيه نعلن بالولا تاكيد
لعاهلنا المليك اللي حبال المجد قاضبها
نجدد بالولا لو كان ما يحتاج له تجديد
وفانا من وفا سيرة سلفنا مع معزبها
لنا مع هجرة ابن سعود صولاتٍ تدك البيد
على صم الرمك لاهبت النكبا هبايبها
قبيلة حرب بالماضي وبالحاضر كعام الكيد
أهل دين ولاء واخلاص واصل الساس جاذبها
تاريخ اسلافنا يحظى مع ابن سعود بالتخليد
على وضح النقا المجرود والتاريخ كاتبها
زمان فات يوم الهوج تذرى بالخطر وتزيد
ونجد بوسعها ضاقت على العالم مناكبها
وروضها صليب الراي وانها شرها الصنديد
عقب كانت ذلولٍ حبلها من فوق غاربها
هذا تاريخها الماضي قبل يسمابها التوحيد
قبل عبد العزيز يوحد الدوله وينسبها
وعشنا بالامان عقود والساده بجنب السيد
مواكير الحرار اللي عشاها من مخالبها
ومنها النادر اللي دايمٍ طلعه يصير بعيد
مضى له فعل يشفع له وعز الخيل منسبها
ملكنا اللي ليا عد الثنا يستاهل التمجيد
فهد. فهد العروبه رايم العليا وكاسبها
وعبد الله ولي العهد يفتل للمعادي قيد
ليا شان اللقا ما فوت الزله لصاحبها
على منهاج أبو فيصل يبشر بالسعد والعيد
يلوح باليمين اللي مقر الجود جاذبها
وأبو خالد مجند طاقته لجل الوطن تجنيد
وزير الجيش حماي الحدود ودون واجبها
محصنها عن أهل الشر وأهل الغدر والتعقيد
حباها الله بحكام جليل الملك واهبها
تلاحم صفنا مع بعض بنحور العدا كالحيد
يمزق زمرة الشيطان باذن الله ويرهبها
وطنا عندنا غالي وفي قيمة غلاه يزيد
ومن دونه ولجله غالي الارواح نجلبها
علينا للوطن حقٍ ما والله عن وفاه نحيد
بسد الوجه نحفظها وباللحيه وشاربها
لينكر حقها المذهوب وارخص قدرها الرعديد
غلاها عند اهلها زاد عين تحت حاجبها
ولا يا شلة الارهاب والتحريف والتلحيد
عليكم كارثه بافعال ما تحمد عواقبها
ضعاف عقول ما تفقه تحسب الدين بالتشديد
أرباب أفكار منحرفه خبيثاتٍ مذاهبها
نواياهم نوايا سود وإجرامٍ بلا تحديد
وشلفا الغدر والارهاب دم العرض خضبها
تبي ترجح لنا الكفه على ما نشتهي ونريد
وخلايا الشر تلقا قدمها فعلٍ يناسبها
وترجع مثل ما كانت ويصفي جوها ويهيد
وتنعم دارنا بالامن صافيةٍ مشاربها
بدينا بالصحيح ونختمه بالشكر والتحميد
عسى ربي يدوم العز ببلادٍ نعيش ابها