البارحة

هذه المرثية في الشيخ مترك بن ذيب بن شفلوت شيخ شمل قبائل عبيدة . .
لبارحة نومي على رأس كوعي
والنوم من عيني بقلعة وداره
يا ذيب هذا اليوم ثالث أسبوعي
والصدر والله موجعاته أعباره
هلت من الشحنة غزاير دموعي
هلت من دقاق الدموع بغزاره
أبكي الأمير اللي يحكم الجموعي
مترك ولد ذيب ويزها الإمارة
الجله شوفه عقب مترك يروعي
رغم أني أدري في محله أنماره
يا جله ما كن بك أمن الناس دوعي
عقب العديم اللي تقادح شراره
أمعشرق قلبي نهار الربوعي
وفي ليلة الجمعة حصل له غياره
وأنا بحكم الرب ماني جزوعي
لكن علينا موت مترك خساره
شيخ على فعل المراجل بتوعي
ما يذبح إلا من طوال الفقاره
شيخ مع أهل الطيب حسن الطبوعي
وبقلبه على من يعصي الله نزاره
شيخ عليه من الزعامة أرموعي
وصلاة تالي الليل زادت وقاره
ماهوب أمير للخبايث دنوعي
كيفه على أم حبيل ولا الزقاره
شهم وله بالطيب مليون بوعي
ولا يجمع الدنيا لقصد التجاره
ولاهوب لنقال النمايم سموعي
ولاهوب يبحث مظلمات الحجاره
قايد عبيدة وارفين الفروعي
قبايل فيها الكرم والسطاره
وعاده لنخوات النشاما فزوعي
لاجاه مضهود بكبده حراره
كم من سجين ما حلم بالطلوعي
راجع أملوك الشعب وأصدر قراره
يا والله اللي راح ما من رجوعي
لعل طوبي هي مقره وداره
أبطلب الله والخلايق هجوعي
يعلي درجاته ويكفيه ناره
يا الله يارب السجود الركوعي
أنك اتعوضه جنتك عقب داره
ويسلم لنا الشيخ الشجاع الشلوعي
مشى على نهج الفقيد ومساره
مناحي اللي للمعالي طموعي
أسس على فعل الجمايل اجداره
شيخ لزينات السجايا جموعي
والشين من بينه وبينه ستاره
وخوانه اللي للقبيلة دروعي
أعوال ذيب وكلهم في الأماره
حاشوا أفعال الطيب من كل نوعي
والكل منهم وافيات أشباره
وخلف رجال للمعادي اتروعي
فيهم على فعل المراجل جساره
يفداهم اللسن البخيل البلوعي
هراج في لجواد ليله نهاره
وصلاة ربي عد حب الزروعي
على نبيٍ احتمل شين جاره