الله يحسن عزاء ربعك عبيده

قصيدة رثائية في وفاة الشيخ مترك بن ذيب بن شفلوت رحمه الله رحمة واسعة واسكنه فسيح جناته:-
أسوأ خبر في حياتي قد تلقيت
موت ابن شفلوت رجال العقيده
الله يحسن عزاكم يا الشفاليت
ويجبر عزانا على فقد الفقيده
قبل الفهر ريعي آل كناد عزيت
واعزي النفس واعزي حفيده
مرحوم يا الشيخ مترك ذايع الصيت
والله يحسن عزا ربعك عبيده
الله يحسن عزا قحطان في الميت
ويعوضنا في محله من يجيده
جاني الخبر والخبر منه تفاجيت
لكن تذكرت والذكرى مفيده
الموت حق ولايحسب مواقيت
الموت في العبد يمشي مع وريده
عزا الله إنا فقدنا ضلع حلييت
اللي تخلص قضايانا على ايده
مترك خذا المشيخه من غير تصويت
وجمع جميع المراجل في رصيده
أقوى شكيمه من الضرغام لاقيت
وأحد وأقوى من السيف وحديده
صليب رأس لما لاقا النعاتيت
يا ثقل روز الشجاع وبعد ميده
مفتوح بابه وبيته بيّن الليت
ونعد بيت الكرم قلنا عميده
ذرا لمن صكته الأيام ويقيت
يوم المعاسير والدنيا الزهيده
عانوا ربوعه من الفرقى وعانيت
والمعضله ما توصفها نشيده
عيال ذيب مطاليق وعلى بيت
لي مات شيخ عوضنا في عضيده
البيت عامر ولا في الصف تشتيت
مبني على ساس وأركانه جويده
هذا مناحي يسرك لاتهقويت
تلقى هقاويك وأشواره سديده
رجل المواقف لما ضاقت وناديت
أبشر بشيخ مواقيفه فريده
وعيال مترك نمور كلما جيت
تقول ما مات خلف له وليده
ادعي له المعتلي ما أصبحت وأمسيت
يدخله في جنة الخلد ويزيده
يا الله يا من على خلقك تعليت
تغفر له وتجعل الهادي قعيده
ومهما تكلمت ولاقلت ما أوفيت
كبر الحدث شتت أفكار القصيده
عن ما تكن المشاعر قلت وأبديت
والله يجبر عزانا في الفقيده
حامد بن غانم الجذع القحطاني