درٌّ ومرجان

الأيام تجري والليالي والأزمان
والوقت مغري والحوادث مخيفه
نعاتب الأرواح ونعذر الأبدن
ما دامها من غير الأرواح جيفه
في الوقت صدمات تجي بعض الاحيان
حد من سيف الزناتي خليفه
لكن مضمون الكوارث والاحزان
اليوم من ضمن الحكايا الطريفه
حتى ولو وجه الزمان الردي شان
ما تنحني روس الرجال الشريفه
في اقصى البحر درّ ولولو ومرجان
ومن دونه أمواج تلاطم عنيفه
ما لك بغصن فارق بين الاغصان
لا اقفى ربيع العمر واقبل خريفه
من راح عمره يتبع فلان وفلان
يشوف من عرجات الايام شيفه
قرب أكثر العالم مهونة وحقران
مال الهوان إلا النفوس الضعيفه
والمجلس اللي فيه غيبه وبهتان
ما عمروه أهل القلوب النظيفه
اقصر خطاك وللحمل خلك حصان
من نية سمحه ونفس عفيفه
للبوم جنحان وللصقر جنحان
رغم الفوارق والمراجل كليفه
لا هان راس يطلب العز لا هان
والذل ترضاه الوجيه الكسيفه
العز ما يحتاج وصف وعنوان
وادي عميق مثل وادي حنيفه
نكتب بيوت الشعر من قلب ولسان
والصدق نور للعيون الكفيفه
واما انطبع شعري فلا اكون سلطان
عبر الزمن طبع الحبر بالصحيفه
دام القوافي والمعاني والأوزان
عسفتها عسف المهار العسيفه