أرباب فكر الرذيله..

المجد صافح يا وطن مستحيله
يا منبر العدل العظيم ووصوله
عليك امان مجيب دعوة خليله
ربٍ ملائكة السماء سبحوله
قيادتك دوحة ذراك الضليله
وشعبك عمى عين المغل وذهوله
العهد راسخ بالجذور الأصيله
بصدورنا تخضر سنابل حقوله
عهداً تبنوه الرجال النبيله
أحفادهم عبر الزمان احتموله
وفيض الولاء عبر السنين الطويله
المجد يشهد به قبل لا نقوله
عز الوطن شعبه قاديل ليله
من شامخ أقصاه لرحابة سهوله
حنا فهد مجد وكيان وقبيله
حنا فهد شعب وقيادة ودوله
حنا سواعد محتمين الدبيله
صغيرنا واللي بسن الكهوله
حنا التفاني والتلاحم وجيله
من قمة الهيبة لمهد الطفوله
حنا الولاء والانتماء والفضيله
حنا الوفاء عز وعقيده وطوله
صفٍ كما البنيان ساسه يشيله
تعجز خفافيش الدجى ما تنوله
وأرض الحرم والمجد الأول وخيله
مثل الأمانه بالصدور محموله
أرض السلام أرض الرسول وخليله
أرض الكتاب الحق مهد البطوله
أرض القيم وأسمى الشيم والنفيله
أرضٍ بها للمجد صوله وجوله
أرض الكرم رمز اتحاد الفصيله
تاريخها بالدم نكتب فصوله
شعبٍ رموزه بالولاء تعتزيله
ما زعزعه فئة ضلالٍ جهوله
اليا انتخينا للهنوف الجميله
عنها تعود الطامعين مخذوله
شامان رمز المجد يسمع صليله
في شذرته سر انحناه ونحوله
والأجرب البتار يسند مثيله
في هيبته معنى الصمود ومثوله
واسم الجلاله والجواد وصهيله
رمز الفداء تاج الصدور الزعوله
بالله وثم سيوف نجد الصقيله
نملك زمام المجد عرضه وطوله
بالله وثم المرهفات النحيله
الشرك والتفكير ندحر فلوله
نبراسنا اللي عزنا ينتميله
المصحف الطاهر وسنة رسوله
نهراً شربنا العز من سلسبيله
عنه يدين العابثين مغلوله
الله هو اللي روسنا تنحنيله
خوف ورجاء نطلب رضاه وقبوله
لا رب غيره لا خضوع لبديله
لو زمجر المأجور وأسرج خيوله
روسٍ تحاول زعزعتنا ذليله
لو حربها المشئوم دقت طبوله
زمرة ابليس أرباب فكر الرذيله
اللي جميل أهل الجميل جحدوله
على قيمنا أهل الخيانه دخيله
روسٍ ذليله. خاويه ومغسوله
أضلهم رأس الفساد وعميله
وعلى حوانيت الخناء طبلوله
ما هزنا فئة ظلالٍ قليله
عن مجتمعنا مارقه ومعزوله
ودمٍ تساقاه الصدور العليله
عرقه على أيدينا فناه وذبوله
نقطع نماه من الجذور ونزيله
حتى تفيق عقول من صفقوله
حزب (أبرهه) وأنصار فكره وفيله
ضلل ابليس أفكارهم وأنصتوله
وأن ما خزمنا اللي يشب الفتيله
حتى على حتفه أينوخ ذلوله
يحرم سنام المجد ما تنتخيله
لو محدثين البلبله شوهوله
والفاجر المأجور يبقى حصيله
أرواح من غرر بهم وأذعنوله
نحيا لعز اللي نموت بسبيله
أعظم علم رواد نجد ارفعوله
حنا سماء المجد ومداه ودليله
من جوخة المهد لشموخ الرجوله
والانتماء ما هو جديد ونحيله
غرسٍ مع الروح اتيزامن نزوله
عهداً ثناه (الوائلي) يحتميله
بأصدق ولاء ما خيّم الشك حوله
عاش الوطن عاشت مصابيح ليله
من شامخ أقصاه لرحابة سهوله