القناعة كنز

دورة الدنيا سريعة ومصداق الكلام
الرجل يصبح غنى والمساء يمسي فقير
والسماء تصبح صحو ثم يكسيها الغمام
بامر ربي والليالي فلكها يستدير
بين مبدا النور الابيض ووحشات الظلام
تمشي الاقدام والدرس الأول والاخير
يعتبر درس الزمن والخطا ذنب وحرام
الطريق الزين ماله حلي ولا نظير
سيرة العاقل تمثل طواريق النظام
من معه عقلٍ يدله ترى حظه كبير
للأمانه شان والمعرفه ذروة سنام
والعلوم الوافيه قادها سلك الحرير
ساعةٍ بالعز تسوى ثلاثين ألف عام
تحت جنحان المذله يصير اللي يصير
كان ما للرجل قيمه وشيمه واحترام
ما تساوي عيشته لا قليل ولا كثير
القناعة كنز والعز للعاقل وسام
الطبيب بحال والراي في راس الخبير
قالها اللي ينسخ المعرفه بالاهتمام
ويتخيّر بين ورد الشوارد والصدير
الجواهر غاليه واللقايط ما تسام
يا مناديب الدعايه ترى الناقد بصير
لكن إن الظلم قصره مصيره للهدام
الصحيح ايشاف والكذب ابو حبلٍ قصير
من نقص من حق الاجواد لو ربع الجرام
ما معه شيمه ترده ولا عنده ضمير
والسلام ختام والمبتدا مثل الختام
دورة الدنيا سريعه عسى المقسوم خير