من أشعار الشيخ حمدان بن محمد بن راشد آل مكتوم (فزَّاع)

المورد واحد

يا شوق عيني عقب شوفك ضميا
عزي لصبٍ ضاميات أعيانه
تطري له أشيا من فراقك وأشيا
مجبور يتركها تحت ضلعانه
إن غض جفنه جاب طيفك طريا
وشلون تغضي بالمنام اجفانه
ما شاف لك بين البرايا حليا
يا غربته ودروبه وعنوانه
عين الغلا يا نور عيني عميا
ما ينظر العاشق عدا خلانه
ان غبت عن عيني تضيق الدنيا
وان جيتني ساق الفرح ركبانه
أموت بك يا روح روحي وأحيا
يا منوة القلب وصدى حرمانه
ليت العمر تقبل سنينه عطيا
وأعطيك من عمري جميل أزمانه
عيت سنيني يا حبيبي وعيا
صرف الدهر يجلي سحاب أحزانه
عيت وأنا روحي بحبك مليا
والعين بك يا صاحبي مليانه
لا تطري المقبل قبل ما تهيا
وتزيد في صدر الغريم أشجانه
ما دام لك بين الحنايا ريا
خل(الوصل) يخطب (رياض) اجنانه
خل العمر يا روح روحي فيا
ويجر في حسنك بديع ألحانه
لك حسن يخجل من بهاه الضيا
سبحان من صاغ الحسن سبحانه
الزين ما زادت بزينه لزيا
زايد بزينه لن زودة زانه
الفرع وارد والموارد (لميا)
ما تنورد .. وأطرافها ريانه
في نشرها نشر الورود العذيا
والنحر منها واضحات ألوانه
والثغر صارت له وصوف عصيا
يوم اجتمع ثلجه على نيرانه
بين البرد والجمر صارت لقيا
كيف التقت لأضداد في بستانه
هذا وأنا عيني لشوفه ضميا