في رثاء المغفور له بإذن الله محمد بن عبدالله البليهد

يجبر عزا أبوه واخوانه وعمانه

مرحوم مرحوم يا ابن الشيخ عبدالله
الله يجزيه بإحسانه وغفرانه
يا الله عسى الجنة الخضراء مقر له
ويجبر عزاء أبوه واخوانه وعمانه
ويا الله يا الله ياللي تبري العله
صبّر عيون تبات الليل سهرانه
وقت العزاء ضاق قصر ابوه والفله
حيل الله أقوى ضجيج الناس من شانه
توه على أول شبابه طيبه اجبله
في جيرة الله عظيم الشان سبحانه
والناس تشهد وسلم الطيب سلم له
مشهود بالخير له من كل صدقانه
وأمات الأيتام والقصّار يدعن له
ما خبر عن من نصاه يصك بيبانه
وربعه هل الطيب والفزعات والمله
صفوة عرب وان عطوا ما هم بمنانه
كم من يتيم ضعيف الحال يفطن له
فعله مثل فعل ابوه وفعل جدانه
حفيد شيخ على الطولات طبع له
سمي جده محمد واكبر واخوانه
وحسيبنا الله على أهل الغدر والشله
والله يحفظ الوطن من كل خوانه
والعار والنار والحقران والذله
للي يخون الوطن ويطيع شيطانه
ويعيش من عاشت الأمة تحت ظله
القايد اللي يبطل كيد عدوانه
فهد ملكنا وعبدالله عضيد له
والبيت معمور بأركانه وسيسانه
واعداد من حج بيت الله وقابل له
صلوا على محمد اللي بان برهانه
عبدالله بن سعود بن سيف السهلي