وشم.. وقلايد

غردي لي ياطيور وحركي روس الجرايد
بددي صمت الطبيعة واجرحي غفوة سكوني
وان لقيتي للفرح في مقنص الدنيا شرايد
بشريني قبل اموت بيأس وأصدق ظنوني
او دخيلك علمينا كيف نخضع بالشدايد
علميني كيف اريح بالي بدمعة عيوني
علميني كيف اعيش بلا سلوم ولا عوايد
كيف اعيش الظلم واضحك مع مخاليق ظلموني
وان تعذرتي بتعليمي ولا شفتي فوايد
عاذرينك عذر كثر الحزن في داخل جفوني
ولو عجزت ولا قدرت افعل سواء نظم القصايد
والله اني لأكتب من الشعر ما يروي جنوني
ولأرسم حروفي على صدر الزمن وشم وقلايد
ولأردف اسمي بالشعر وليا ذكر معه اذكروني
هقوتي ذي يا طيور وكل يوم وهي بزايد
لا تعذليني دخيلك مع مخاليق اعذلوني
وان لقيتيني صريع بدرب مقطوع السنايد
استريني عن نظر من يفرح بشوفة طعوني
وان بكيتيني ومال من البكاء روس الجرايد
قولي الله يرحمه ولا البشر ما يرحموني