ما انساه لو بقيت من بعده سنين

هذه مرثية المواطن خلف عيسى الخلف الشاعل، بابنه الشاب الذي وافاه الاجل المحتوم صباح يوم الاثنين 19/5/1423ه، إثر حادث مروري في منطقة تبوك.
واقلبي اللي كن يضرب سكاكين
من منطقة تبوك علم مفاجي
واعيني اللي كن فيها لبن تين
والنور قدامي تقل شكل صاجي
جاني خبر من طلعة الشمس بشوين
لا عاده الله يوم غير مزاجي
غير مزاجي مع مزاج الكثيرين
العلم بالجوال روج وراجي
قال الخلف بالعين والياي والسين
اسم الحبيب وداخل القلب داجي
هذا الخبر قطع عروق الشرايين
لو حاولوا بي تقل ماني بناسي
لو جمعوا زهور كل البساتين
لو حاولوا بالطب يصعب علاجي
عساك يالجوال تجول بالطين
حتى تصدي ما تجيب المناجي
يا شين صوتك مع فراق المحبين
وش عاد لو كعبك من العظم عاجي
حبيب رافقني حدود الثلاثين
ومالي على المكتوب أي احتجاجي
يا رب صبرني على الزين والشين
يا من فجعت القلب باول انتاجي
يا رب عونك في صلاح البقيين
ويارب سهل حاجتي واحتياجي
لو التجي للهند والروس والصين
بالعون مالي غير بابك ملاجي
ومواتكم يا ناس ماهم رخيصين
لكن شريك القلب وضعه يفاجي
ما انساه لو بقيت من بعده اسنين
لو الظهر حودب بدا بالعواجي