يكتبها: المسفهل

على كيفي

* يقولون «طباخ التمر» على الأبواب وأنا أقول الله يسامح اللي اطلق عليه هالقب، المفروض يقولون «طباخ البشر»!!المشكلةانه بيقعد على قلوبنا شهر كامل الله يعينا!!.
* بالله في جنيف والا شواطىء نيس والا سواحل ماربيا يعرفون شيء اسمه «طباخ التمر» يا حظهم!!.
* انا ما يقهرني ولا يفقع مرارتي الا هالمراهقين اللي قلدوا في الاجازة «رونالدو» وقصته الغريبة «المكنسة» اقول لاصحاب المكانس الوعد المدارس!.
* ياني فطست من الضحك يوم شفت ذاك الشايب اللي يتجاوز عمره السبعين وجالس يلعب مع الاطفال في الملاهي الا ومن زين الطبايع الاخ صابغ لحيته ب«الحنى» وش بقى ما ظهر!.
* يقول جاري ابو علي اكتب في زاويتك عن مشكلتي قلت وش هي قال راتبي 3000 الاف ريال وفاتورة الكهرب في شهر 1500 ريال وش اسوي؟!
*عكوز بكوز في كل خيمة مركوز عرفتوه الا اقول لكم هو اللي اوله م وآخره خ!!.
* وين اذاعة mbc fm اول سنتين بصراحة صارت هالايام اذاعة « و عm »!! اول اغاني سعودية وخليجية جميلة والآن «طقطقة» وبرامج سخيفة ومذيعين ومذيعات درجة عاشرة!!.
* صاحب قاعة افراح مقهور من اصحاب الاستراحات سألته ليش قال اكلوا الجو علينا وسرقوا العروس منا هالصيف قلت له «ساد» من قال لك تؤجر الليلة ب20 الف!!.
* واحد زوج ولده جاه 120 «حفالة» يعني خروف حي مات منهم 60 من الحر والباقي باعهم في سوق الغنم بنصف القيمة!!.
* قال لصاحبه ابسافر قال لا اصبر لين يطيح الرطب علشان اسافر معك قال يا قديم البركة في الثلاجة طول العام «نخرف» منها!!.
* يقولون ان احلام شرت طيارة وانها تفطر في دبي وتتغدى في القاهرة وتتعشى في جدة.
الله عليك يا احلام من «طقاقة» الى طيار وطيارة عاشو الطقاقات!!.
* وعلى طارىء الطقاقات يقولون ان فيه «طقاقة حصلت على 100 الف ريال في ليلة واحدة في احد الافراح بالرياض لا وناوية تفتح باب الاحتراف في «الطق» عاشت ام....؟!.
* الاسبوع القادم اروي لكم قصة صديقي القروي اللي سافر لاول مرة في حياته وكيف كانت حالته في الطيارة؟!.