عثرات الشعراء

من حكا في «جابر العثرات» خابر ما حكا إلا من صوابه بالزنادي الجازية: الله يجزاك خير.. مالك ومال الشعر!! حسين في باب المكتوم والمضغوط فصل «المحترق» من كتاب «خرطي القوافي إذا هبت السوافي»!!

الأسبوع المنصرم أو الفائت.. يا هووه.. كلام قوي
بس يوهق.. الأسبوع اللي راح.. ايه يا شيخ كذا.. كتبت عن الجازية وسحايب خير.. مع العلم بأن لهن بعض القصائد المنشورة الجميلة وأقول المنشورة..
وهاالأسبوع بنعيد على الجازية فقط وواحد بطران أبو الترزرز والأخبار والقصيد اللي (ببهارات). لكن بداية أرسل لي الكثير قصائد وأبياتا في شخصية جابر الناقد (وليس ذاتي أنا) وأشكرهم عليها وأيضاً نشر إخواني في مدارات الآراء التي لي والتي ضدي واستفدت من الرأيين وأشكرهم أيضاً عليهما ولكن توقفت عند أبيات من شاعر اسمه (بحر المشاعر) في الحقيقة اعجبتني قافيتها وسبكها وفكرتها وأحببت نشرها ورديت عليها شاكراً لكل من خالفني في الرأي أو وافقني عليه (مع العلم أن الموافقين احبهم أكثر) يقول بحر المشاعر:
أنت ياللي صرت للهفوات جابر
لا يغرك هرج راعين الدوادي
سر وطنش هرجهم وارق المنابر
انت صح وراعي الهفوات غادي
لا تلفت للسقيم اللي يكابر
هو بوادي وانت.. يا جابر بوادي
الفحول أموات في وسط المقابر
مبدعين القاف وافين المبادي
ويوم صار الشعر للي جاك عابر
يحسب إن الشعر للغادين عادي
شانت اطروق القصيد بعين صابر
يوم جانا فوجهم مثل الجرادي
ورديت بقصيدة متواضعة قلت فيها:
مرحبا حييت يالشخص المثابر
عدما هبت ذعاذيع البرادي
والله إني كنت يا رجال خابر
لين صرت موكدٍ علم البلادي
كنت ساكت لا وربي كنت صابر
لين شره البوم بصقور الهدادي
بعدها قربت طرسي والمحابر
اكتب اللي ما يخالف للمبادي
واعرف إني، ما امشيت الدرب شابر
اقطعه كله بعزمي.. والعنادي
لين ما يبقى لها لتخريف دابر
وانتم حزامي بجدي.. واجتهادي
والزمان اللي مضى لو قيل غابر
فيه شعرٍ بين حضره.. والبوادي
ووقتنا هالحين والشعر متزابر
يشترى ويباع من خبلٍ ...وغادي
ما نضيع بالمظاهر والمخابر
التجارب تظهر رجال القوادي
واصبح الشاعر وله كم شخص سابر
وشاعرات اليوم يا دادي.. ودادي
نصفهن عقال.. واجواد.. واكابر
ونصفهن ما بين تحدير... وسنادي
ومن حكا في (جابر العثرات) خابر
ما حكا إلا من صوابه بالزنادي
وزدت في عدد الأبيات لكي لا تحسب بأنها مساجلة موثقة، بل إنني كررت قافية (صابر) مع العلم أن بحر المشاعر سبقني عليها.. المهم نعود للجازية التي تقول:
ضيعتني ما بينهم وين ابلقاي
لقيتني زمره مواجع لحالي
ثم:
دخيلكم ياللي تعدون خوياي
طلبتكم لا تطرحون السؤالي
يا جماعة اذكر أنها هدية الشعر وغيره ولكن اكتشفت (أنا يا جابر) أعوذ بالله من كلمة (أنا).. بأن الجازية عندها مشكلة كبيرة في القافية والدليل أنها تعسر الكلمة حتى تأتي لمعناها ومع ذلك بها خلل انظروا الشطر الأول (وين ابلقاي) يعني وين ابلقى نفسي.. أي وين ابلقاني؟!
تصدقون دخت؟!!
لأن المفروض وين ابلقاك مو القاي..
وبعدين لقيتني.. والله لو باكستاني توه متعلم عربي ما يقول كذا ممكن يقول (أنا ما فيه يلقى أنا).
تعالوا للبيت الثاني والكلمة الأخيرة (خوياي) واهل الإمارات يقولونها ولكن رجالهم.. وهي أنثى تقول (خوياي) المفروض (خوياتي) وكل هذا وهي مثبتة.
أقول الله يرحمك يا بوزيد اشهد أن ما عندك مشكلة في الشعر ولا القافية إلا مت وتمشكل الشعر يقول رحمه الله:
قلت خطا كانك تمشيت برضاي
واخطيت كانك ما مشيت بهوايه
راجعوا شوفوا القافية.. مو الجازية.. وما علي من الحكي اشهد إني شاعر والدليل قصيدتي على قافية واحدة.
الجازية.. الله يجزاك خير ما لك ومال الشعر والا لا تكثرين الأبيات ويصير الموضوع تمام..
***
يا جماعة ركزوا معي تماماً وانتبهوا وإذا كان أحد (متغدي) يشرب بيبسي ويركز معي:
الود ما يعطى جميع المخاليق
الود يعطي في المخاليق واحد
شفتوا الحكمة ابن شريم الشعر الجديد.
الود ترى ما يعطي جميع المخاليق.. يعطي واحد وانت وحظك.. مشوها.. يالربع طالبكم باعطيكم غيرها سموا:
والله ان ودنا يا فلان بام العباه
آه ياما جرا لي عند هذا الغدير
ثم ابن شريم على غفله يقول:
مرني مرتين وراح بعضي وراه
واكتمل بعضي الباقي هذاك العصير
ثم:
ولا حكى يا رفيقي يا ويل أمه ويلاه
اشهد أنه بليغٍ واشهد أنه غزير
ثم:
امتلت به عيوني والخفوق وحشاه
هل يجي مثل ما قد صار لا ما يصير
تعبت واتعبتكم لكن خذوا الأخير:
بنت ناس عطاها الله مال وجاه
لو تمنت حصير يصير تحته حرير
وابقى قابلني لو فلحت بالشعر يا حسين فهد القحطاني.. يا ابن شريم على غفلة..
يا جماعة البيت الأول ودنا بام العباه ويقول لرفيقه بعد..وش هالحكي!!
البيت الثاني (راح بعضي وراه) تدرون ورا من مهوب رفيقه لا.. ورى أم العباه (مؤنث) والأخ ما يعرف مذكر ومؤنث أم العباه لازم يقول وراها..
أو يخلي كل قصيدته مذكر مثل حبيبي سافر.. وهاجر.. وراح.. على أنها ذكر أو أنها أنثى حبيبتي سافرت.. وهاجرت.. وراحت..
المهم.. نكمل البيت الثالث يمكن بلهجة منطقة معينة بالجنوب تجي موزونة لكن باللهجات اللي أنا أعرف حتى لو أنها جنوبية ماجت معي لأن الياء زائدة وربما جهلي باللهجة.. لكن أقول ما يجي عجزت أمشيه..
الشطر الثاني بليغ وغزير.. وش الفرق؟!!
ولا شيء المفروض يقول: (اشهد انه قليل...قليل واشهد أنه غزير).
قليل الكلام غزير المعاني أجمل، فالكلام:
ما قل دل وزبدة الهرج نيشان
والهرج يكفي صامله عن كثيره
هذا راكان الله يرحمه مهوب انت يا الحبيب
لكن غزير وبليغ نفسها اجل حبيبك يمطر كلام!!
تعالوا للبيت النكتة يقول (الخفوق وحشاه) يا جماعة عمركم سمعتوا حشا الخفوق!!!
اعرف بيت للأمير محمد السديري رحمه الله يقول:
لطف الحشا يا زبن لو يلمس الميت
شاف الحياه وطاب من كل بلوى
والله يا شعرك ولا واحد من مليون من الأول ولا الثاني (لطف الحشا) مو حشا الخفوق..
خفوقك قدر؟!! والا (الولاء للمنتج)!!؟
تعالوا.. للأخير..
(لو تمنت حصير يصير تحته حرير)
أولاً لو (تمنت) يعني انثى ثم يصير (تحته) يعني ذكر!!
ابجديات الشعر التذكير والتأنيث لأن القصيد لافقد ترابطه ضعف حتى لو كتبه نجم من نجوم الساحة وادعى أنه مبدع؟!!
إلا إذا كان بيقول إن (تحته) بلهجة أهل الشمال!!
فباقول.. وقف مو على كيفك يا بن بطوطة تكتب بكل اللهجات.
أبقولكم بيت لسيد الشعر الأمير عبدالله الفيصل اكمله الأمير سعود بن بندر رحمه الله ويا ليت عندنا من حدى الثنين 10 شعراء مثلهم كان ما علينا خلاف المهم.. يقول:
والله إنك كل ما تلبس حلو
لو لبست خياش زينت الخياش
وحصير وحرير شوفوا الفرق يا جماعة..
اقول يا حسين القحطاني لا تسوي الشعر (مضغوط) ولا تصير بعد نقدي هذا لشعرك (كاتم) في قلبك بالعكس خل روحك رياضية وعادي انت ما عندك شعر.. عندك خرطي وانت بسويلك خصم إن كانك تبي غلاف إعلان في كتاب (خرطي القوافي.. إذا هبت السوافي) وانت في باب (الشعر المكتوم والمضغوط) فصل (المحترق) من الشعر.. واللي في القدر يظهره الملاس!!
توقيفة
بردت كبودكم هالأسبوع بالحكي لا الجاي أحلى
ولا حتى تحلم.. فيها.. انكم تعرفون من أنا؟!!!
(جابر شايف نفسه).