عبدالله اللي غايته نصرة الدين

للوطن

الواحد اللي بالعطا ما يمنّا
وانظم بيوت مالهنه تثامين
لجل الوطن هاجوسي اليوم غنّا
حنا سعوديين بالعهد وافين
والرابح اللي بالشدايد زبنّا
وحنا سعوديين للخير داعين
وافعالنا عند اللقا يشهدنّا
وحنا على منهاجنا اليوم ماشين
حتى لو كلاب الحسد ينبحنّا
ما نستمع لهروج بعض الشياطين
في دين رب الكيانات اعتصمنّا
نصول بالشدات ونلين باللين
ووسايل الإعلام ما روعنّا
نفخر بحكام علينا عزيزين
وبكل لحظة نفتخر في وطنّا
فينا الفهد والفهد يعرف من سنين
رجل السلام اللي بقلبه سكنّا
هو خادم البيتين وابو المساكين
امن بلدنا وابعد الخوف عنّا
وعبدالله اللي غايته نصرة الدين
بالمؤتمر مواقفه يسلمنّا
في مؤتمر بيروت قدم السلاطين
عرض عليهم فكرته ما تونّا
لجل السلام ولجل عودة فلسطين
أعلن شروط للأمل يحفظنّا
بامبادرة تحمل جميع العناوين
سلام واستقرار في كل فنّا
في كلمته وضح جميع المضامين
من شان كلٍ بالسلام يتهنّا
القدس تصبح عاصمة للمسلمين
وحقوقنا اللي ضايعه يرجعنّا
وحدودنا ترجع لسبعة وستين
واللاجئ لداره يجي دون ظنّا
هذه شروط امبادرتنا وراضين
وحنا على رب العباد اتكلنّا
تسلم لنا ياللي نصبت الموازين
تسلم يابو متعب لنا وانت منّا
ألجمت بافكارك جميع المعادين
ولك البيارق بالوفا يرفعنّا
ندعي لك الله يوم قمنا مصلين
يحفظك ياللي دايم تحتظنّا
واختامها واعداد نبت البساتين
صلوا على المبعوث لانس وجنّا
عطاالله بن سليمان العطاالله - الزلفي