(وش طاري الذكرى)

وش طاري الذكرى.. أنا خلت ناسيه
...... وإلا ليالي البرد.. تشبه حضوره!
في رجفة ضلوع الأماني مواريه
........ وفي غيبة القمرا.. تعالي غروره
... ان قلت ابسلى.. جمّعتني طواريه
........ واليا اجتمع فيني.. تبعثر شعوره
ياليل قلّي.. آخرك وين تاليه!
.......... خوفي آحن.. وتالي اشتاق ازوره
ماهو عشاني.. لجل اضمه وادفيه
.......... والا ان بغيت اشتاق.. يمي عطوره
اول ينادي.. وابتسم له والبيه
........ واليوم حال الوصل.. يندب جسوره
كسرت مجداف اللقا عن موانيه
......... واخذت قبل البُعد.. برواز صوره
يشفع ل باكر حاضره قبل ماضيه
......... ان طاح من عالي، تلقفه سوره
اللي اعرفه اجهله قبل ما ابديه
.......... تبكيني الاطلال.. واشتاق دوره!
هذا انا، والليل، وبارق تواليه
.......... وهذاك وجه الصبح، ما شع نوره
وش طاري الذكرى.. انا قلت ناسيه
........... وإلا ليالي البرد.. تشبه حضوره!