شيخة فلوس

مظهر شعاع الحق من عقب الادماس
سلام فيه الطيب والحب مغروس
من صادق شعورن بها كنة احساس
على الجبين اللي بعزه وناموس
من طلعته عن الظفر مابه انعاس
عزيز قوم(ن)طاهرالقلب ولبوس
ساسه من اللي يطنخ الراس من ساس
في مستطيل الفعل له وقع ودروس
باللي احقره تاقع مثل وقعة الفاس
صاطي وقرم برفعته ترتفع روس
حتى خويه يامر ورافع الراس
شمسن وكنتها على المغتضي شموس
كنه يرى نجوم القوايل بالاشماس
اللي خمن به قال يدور بها فلوس
يمدح أمير وشيخ مع باقي الناس
لا واللذي غير عن الحلم كابوس
وتحت البسيطه جاعل الظلمه انفاس
تشاوت الافكار يم شيخ محبوس
عن المدايح لانه بحالة افلاس
شيخن ثواه الفقر والفقر منحوس
شيخن يسوق الجزل لو ماجده طاس.
ماصك باب الطيب والحال مدعوس
صيته يذاع مع الذي مالها قياس
يزم روحه مع مشاكيل ويدوس
زبرن وبه عدى على روس الاطعاس
بهاره الطيبه بها البن محموس
والهيل ريحه صلفن ويجلي عماس
ينحر عزوم اهل الردا بعزة نفوس
مال الزمن غير الظفر للردى باس
سمين فعلن ماضرى للورى ينوس
يشلع عن الزله مشاليع قرناس
الصدر صافي مانمى فيه مبخوس
مهما ظهر بالناس حاقد وبخاس
مثل البذر اليا تناقلته اعسوس
بشّت حجاجه بالمعادين وانجاس
انا اشهد إن الوقت ينبع لنا دروس
ماتنشري. بفلوس من طيب الاغراس
في وقتنا افتح قوس ثم سكر القوس
( اقفى حكيم الراي ) من بين الاقواس
الا القليل اللي بحنكه وناموس
مثل الشعاع ان بان من جوف الاكباس
لكن هذا الوقت شمشل بنا يحوس
لاباس ياذا الوقت مادمت عفاس
هذا الزمن احيان حيّه ونادوس
واحيان يجذبنا بإيقاع مرواس
قبل الختمام اللي طرالي بهاجوس
وخلاني انكس من اسداس لاخماس
وفي وقتنا الشيخه ترى شيخة فلوس
لو إن ما فعله يفوق ام خماس
- فارس الجهيمان