أبو هلا.. كل العرب يعرفونه

مرثية في الشيخ فهد بن منصور بن منيخر العجمي -رحمه الله-:
كلٍ عقب فرقاه تهمل عيونه
ودموع عينه فوق خده شخاتير
مرحوم يا جارٍ تقفّت ظعونه
عساه فالجنه ويجزاه بالخير
أبو هلا كل العرب يعرفونه
فهد ليا عدوا رجال المناعير
مفتوح بابه دوم للِّي يبونه
ما صك بابه في وجيه المسايير
جيران بيته والنشاما يجونه
في مجلسه تلقى معزه وتقدير
كريم متواضع ونفسه حنونه
دمث الجناب ولا يهاب المخاسير
عون الضعوف اللي يبون المعونه
وريف الأرامل واليتامى المعاسير
لا جاه مهمومٍ تزايد شطونه
يرتاح من عقب العناء والمشاوير
الطيب والناموس دايم زبونه
فزاع ما يكثر عليه المعاذير
كل الرجال الطيبه يمدحونه
يجزاه بالحسنات وال المقادير
خلّف رجالٍ مثل شكله ولونه
فيهم على كسب المراجل صعاطير
على طريق المرجله يتبعونه
بوجههم تلقى السعد والتباشير
الشاعر/ عبيد بن فالح بو جراح أبو ثنين