لوحة

اشوفك بالقمر لامن تجلى بعد نصف الليل
واشوفك بالسحاب اليا تعلا واسبل اطرافه
واشوفك بالبروق اللي تكاشف كنها القنديل
واحس ان البروق لخافي الاسرار كشافة
على القهوة حديثٍ فيك يكفي عن وجود الهيل
إذا اطراك المقهوي عنصر التبهير ما ضافه
بلغ حبك بقلبي ذروة الادهاش والتهويل
اذا وصّفت غيره شي ثاني.. تطلع اوصافه
احبك يا فتوحات الغرام من البحر للنيل
وإلى باقي التخوم اللي حكمها الحب باعرافه
واشاهد لك من الحرمان ضدي طايرات وخيل
تسابقها ظنونٍ في هلاك الحب هتافّة
لك النصر المحقق باعتراف الدمع والمنديل
تسلّمني عروشٍ خاوية وجروح نزافّة
جميع الاودية ترفض مروري غير وادي ويل
سمح لي بالمرور وحط لي حرّاس سيافّه
غريب الاودية صارت تعذّر ما تحب السيل
تباب لكل وادي ما يمر السيل باجوافه
انا رجلٍ خلقه الله شاعر يحمل التوكيل
عن الشعر السجين اللي كثير الناس ماشافه
اهيم بعالم الشعر الرهيب اللي يهدّ الحيل
واجي سجن المعاني واطلق المعنى من اكتافه
انا خطٍ تصافح عنده اول جيل واخر جيل
انا من حقق اهداف القصيد وضيّع اهدافه
أنا من مثل الشعر الصحيح وحارب التمثيل
ولا ردد نشيد يمدحه ويعيّب أسلافه
تتبعت الجمال المختنق في زحمة التجميل
ورفعت الظلم من ذاتي عليه وقمت بانصافه
درست الكون في عين بصرها محكم التنزيل
وفي نفسٍ شجاعة من عذاب الله خوافه
قطعت الألف ميل من الوفا بحساب واحد ميل
على باقي شراعٍ كسّر الحرمان مجدافه
خذت مني محبين الوفا كيفية الترتيل
وهذا علم نافع ما يبور بكف صرافه
يكفيني وأفاضل وأتميز واهدي التفضيل
الى غيري يقوي موقفه ويعز ميقافه
أزيد الكيل للنخوة وأموت ولا نقصت الكيل
ولو جاني من الاحباط تيارات جرافة
أنا عاموديٍ تابع مسيرة فايز بن هذيل
زهد نخوة على اشداد الفخر والدرع باكتافه
عزومي ما يهبطها رصاص الكذب والتضليل
ولا يهزمني الحاسد بعون الله وأحلافه
أنا يهزمني المعروف بالموجز وبالتفصيل
كما يهزمني الحب الحقيقي يقطع أسقافه
- ذيب الشمري