يمّه ودرب الحزن ما سد ريعه

مرثية مؤثرة للشاعر ناصر بن كروز في والدته- رحمها الله:
يمّه أنا ذقت الحزن والفجيعه
وكل المصايب والمآسي والأوجاع
حمّلت قلبي حمل ما يستطيعه
في غيبتك تغيّرت كل الأوضاع
القلب يبكي والليالي سريعه
معذور يا قلبٍ من الحزن ملتاع
يا من يودي علم والاّ يذيعه
ويقول يا درب الحزن وين الاسناع
يا موت ما خليت سنه وشيعه
خذيت بذراعك من الشبر للباع
يعني هزيعه ما وراها هزيعه
ماتت عفيفة بالوصايف والأطباع
لله تسجد له خشوع وتطيعه
في قلبها للناس مشتى ومرباع
آهات وهموم وجروحٍ شنيعه
وعبرات مكبوتة لها أشكال وأنواع
ما عاشت بحيلات والا خديعه
ما قلبها الصادق حقودٍ وطمّاع
فوق الجبال الشامخات الرفيعه
نظراتها للعطف شرهات ووساع
اسمك وذكرك دايمٍ فالطليعه
وعلى الضعيف رواق وحجاب وشراع
ما من رجاء فالصبح وإلاّ تبيعه
في غيبتك زاد الألم بين الأضلاع
يمّه ودرب الحزن ما سد ريعه
أون لا صاروا هل البيت هجّاع
ما اشري غلاك وما اقدر إني أبيعه
حبك رسخ فالقلب انصاف وارباع
اعدي كما تعدي السباع المجيعه
واهرف هريف الذيب لا شاف نجّاع
فجيعتي يا كبرها من فجيعه
يدري مجرّب واغلب الخلق قطاع
دمعٍ وقف عيا يا مال القطيعه
مغرورقن ليته يحوّل على القاع
مصدوم ما دونه حصونٍ منيعه
لا الرمش يشفع له ولا القلب فزّاع
آمين في جنّات خضرٍ بديعه
آمين ياللِّي له هل الخير خضّاع
مرسل نبيّه للخلايق شفيعه
للرزق يأمر به وللصوت سمّاع
فردٍ صمد منزل كتاب الشريعه
سبحانه المعبود هو خير مناع
الشاعر/ ناصر بن كروز