الأفضلية تراها للشواويه

الله يحفظ محنية شامان
اللي تحفظ الدين وفروضه
في ظلهم كل الحقوق تصان
حتى حقوق الطبع محفوظة
وشريعة اللي أوجد الإنسان
معها مبادئ الغرب مرفوضة
هذا الكلام اللي على برهان
وزرق الحجج بالحق منقوضة
الإهداء الى سعادة الفريق/ أسعد عبدالكريم الفريح مدير الأمن العام.
سر ياقلم,, واضبط السرعه على الميه
واربط حزام الأمان ,, وسمح النيه
وشارك بجهدك وفكرك قد ما تقدر
تعبير عن ماتكنه من وطنيه
تفاعلٍ مع جهود الأمن والدولة
اللي هدفها سلامتنا المروريه
وحزام الأمان تطبيقه من الواجب
ولاخير في حاضر ما عز ماضيه
وأهل المحازم,, أهلنا من زمان أول
واليوم حنا أهلها بعد الألفيه
ولمواكبة عصرنا لابد ما نعمل
ونظهر بصورة مع العالم حضاريه
إلى متى الفوضويه في تصرفنا
وتضحك علينا الخوجات اليهودية
وواصل طريقك بعزم وسع الخاطر
وخلك مثالي وتدعي للمثالية
ومفاجآت الطريق أخذ الحدر منها
وسلم على كل شبر من السعوديه
وليا وصلت النفوذ أخذ احتياطاتك
والأفضلية تراها للشواويه
لاجيت في دارهم لازم تداريهم
والصبر طيب ومحموده مساعيه
واحذر من أهل النياق ,, ولا تنرفزهم
كم سايق راح فيها عند بوريه
وليا وصلت القرى فاخذ الحذر كله
مدهال بيض الدداسن والعليمية
اما نطحك وضربك بنوره العالي
والا اعترض بك بدون انوار خلفية
وليا وصلت المدن,, أخذ الحذر كله
وأحفظ مباديك والغلطات مقفيه
وإياك تسهى عن الهاكرز وأخطاره
اللي يشكل على العالم خطوريه
اللي حباله مخلاة على الغارب
وليا مشى سرعته دايم جنونيه
واحفظ حقوق المشاه ولا تضيعها
لو كنت عجلان فالحاجات مقضيه
الطفل والشايب ومنهو بحسبتهم
إليهم حقوق على شرواك شرعيه
أما ليا شفت,, جمع مؤنث السالم
وقف,, وعبر عن الروح الرياضية
وتحقيق مبدأ السلامة همنا الأول
وإيجاد بيئه مروريه وعصريه
واليوم فيه اقتراح لكل مستهتر
اللي ليامن نصحته زاد في غيه
يضرب بفيروس حمى الوادي الأهبل
ماللمصدع علينا غير هذيه
وليا بداله على طول الزمن لازم
ما يمنع إنها تسوق به السنافيه
كثرت علينا الحوادث والسبب واضح
والوضع يحتاج له وقفه جماعيه
كم نفس راحت سببها من فعايلها
وكم نفس راحت وهي من نفس مبليه
عينت شقراً تسر القلب والناظر
بعد تلوابهاراع المنوفيه
وإن كانك أخطيت وأنته ساهي لاهي
ماعاد لك عذر غير الدبلوماسية
قل يارجال الأمن: يجوز للشاعر
مالا يجوز لغيره والسموحيه
قفى زمان الوسايط وإنتهى دوره
وقسيمة تاصلك ماهيب ملغيه
واسلم وسلم على محمد ولد نايف
اللي صعد للعلا وبكل جديه
وقل له جهودك يابو فيصل نقدرها
ولك التحيات مربوعه ومثنيه
والله يعز الوطن في ظل قادتنا
ويديم عصر التقدم والرفاهية
ملاحظة:الشقراء هي التي قلت فيها:
يحق للغرب لو يبكي مشاهيره
لكن أهل نجد ليش تون زعلانه
عبدالله بن عبداللطيف بن صلهام العتيبي
ساجر الحملة الوطنية