رجل الأمن والعدل

أنت اختيارك صح وانا حظيظين
صبت الهدف بالعدل والكل شايف
والناس باللي يفعل العدل راضين
العدل ترضى به جميع الطوايف
وانتم محلٍ للعداله وعدلين
وحنا نبايعكم بروس النوايف
متبينين وصادقين وفخورين
نعلن ولانا بالقلوب النظايف
الشعب وافي والمعازيب وافين
من يومنا فوق المهار العسايف
يوم الظما والجوع والفقر والشين
كسيرنا لو نجبره بالكتايف
معكم على الشدات والعسر واللين
فوق الركايب موميات السفايف
يوم السنين الماضيه والاكاوين
ويوم السماوه يشهدٍ الرهايف
ويوم الرغامه فعلنا شيف بالعين
نرسي اليامنه جفل كل خايف
وحنا ترانا مثل اهلنا القديمين
واليوم خير وعز والراس كايف
في ظل أبو متعب عسى عمره اسنين
ونايف زبون للصعاب الكلايف
ما للكبار إلا الرجال المسمين
نايف هو أكبر من كبار الوظايف
رجل الأمن والعدل والطيب والدين
نايف عليه من المؤسس وصايف
عبدالعزيز أبوه سيد السلاطين
نايف ستر بيض البنات العفايف
سور البلاد وضد كل المعادين
الامن خلا الناس مثل الولايف
بجهود نايف والمخاليق دارين
بارادة الله ممنن كل خايف
بالله وثم فعل الرجال الميامين
نايف ذرى الأوطان عن كل حايف
ياطا على روس العدا والشياطين
عادل ومتواضع وبالشعب رايف
وخيره وجوده عم الاقصى والادنين
ما قال أباسافر لذيك المصايف
لجل الوطن يسهر ويدفع ملايين
وما حج حجاجٍ على البيت طايف
صلوا على اللي علم الناس بالدين
بداح بن محسن بن عبود السهلي