شعر/ بدر بن عبدالمحسن بن عبدالعزيز

رحل سلطان

تبسم يا سنين من المحبه والعطا والنور
طلبتك لا تصد ولا تمن بضحكتك ليله
أنا قلبي حزين وخاطري يا سيدي مكسور
رحل سلطان يا سلطان من غيرك ابشكي له
أبجلس عند ركبة من يغيث الباكي المقهور
وبسمع منه ما يطفي لهب قلبي وياوي له
طلبتك هالفراق وغيبتك والمجلس المهجور
وصوتك والضيا في لفتتك تشعل قناديله
طلبتك والعطا يسبق يمينك والسجايا بحور
وأنا أدري اللي كتبه الله علينا صعب تبديله
ألا يا سيدي خجلى القصايد خادمك معذور
رثاك الشاعر اللي لو لمحته كان ترثي له
رحل سلطان عبدك يا الكريم المانع المشكور
رحل لحماك يا رب السما ترفع منازيله
ألا يالله تجعل ذنب سلطان الصخا مغفور
ويفرح في نعيمك من جميع الناس تدعي له
سكنّي الحزن كلي ما ترك قلب ونظر وشعور
طواني الهم كلي سيدي ما في يدي حيله
وليته لا رحل مثلك حفرنا في السحاب قبور
وعشنا في رجا وسمٍ نشوفك في مخاييله