ابتسم

خل الورود الي جفت صحرا
الرياض
على جبينك ترتسم
تكفى ابتسم
رد الضيا للنور
واحي القلوب البور
في غيبتك
كل الرياض أطلال
وكن البيوت قبور
تعال يا درع الرياض
تعال علمنا البياض
طيبه ومكة تحتريك
وابها وحايل والفياض
في غيبتك يا سيدي
مريت من شوقي بويب
واطلقت نظراتي لأطراف
الشعيب
وشفت النخيل
الي تظلل في ظلالك
الي كثر ما طال
يا سيدي ما طالك
وسمعت له صوت وحفيف
تقل يسأل عن احوالك
ولوما قسوة جذوره
لملم عذوقه وجالك
وسمعت للنوق ابتهال
مدري حنين
وكنها تبكي تبيك
وقامت جميلات الضبا
عند المضحى تجتول
كنها تدور عليك
ابتسم يا سيدي
في ضحكتك تحيا قلوب
وفي بسمتك
عز الديار
من الشمال الى الجنوب
ليتك تشوف الناس
يا سيدي بغيابك
كنك ابو الأطفال
وكن الشيوخ اصحابك
والصبايا فوق شرفات البيوت
تنتظر جية ركابك
والله اني عارف يا سيدي
همك
وان الألم ولا المرض ما همك
لكن ابشر سيدي
حنا بخير
واليتامى والأرامل
والشيوخ بخير
والمعاق الي رعيته
والفقير الي بنيت بجودك
المعهود بيته
ما نسوا ذِكرك
حتى بصلاة الفرض
وكل الكفوف معلقه
بين السما والأرض
الأرامل تشتكي
واليتامى ترتجي
يطلبون الله تجي
ولو جيت طابوا كلهم
بس ابتسم
حتى نتعلم
كيف في عز الألم
نسما على كل الجراح ونبتسم