لوحة

مثل قود الراعي الخلفة على مرعاها
قاضبينه بالرسن وموثقين زمامه
ما يجيبون البيوت إلا على معناها
حافظينه من وراه وجنبه وقدامه
حفظ راع البل بله والعدو يبراها
لو يورد صوبها ارماحه وروس سهامه
والله انه ما يفوز بها ولو يبغاها
ومثل ما للشعر باني للشعر هدامه
يهدمون بيوته اللي عاليٍ مبناها
أكثر الشعار يرعى في خلاه أوهامه
جا يكحلها وكحل عينها وأعماها
مثل راعي ضيع البندق وطاح حزامه
والرعية قدم عينه ذيبها جلاها
جعل ذود ٍ فوق عذبات العدود حيامه
ما يصدر بعد يارد لين يشرب ماها
واه من بحر القصيد ونفسي اللوامه
كل ما اردعها عن بحور الشعر وأنهاها
عودت من حينها للبحر والدوامة
كنها عبارة وسط البحر مرساها
وكل رجال طموحاته بقدر أحلامه
لو يدورها على مد النظر يلقاها
أحد حلمه ما تعدى خنصره وإبهامه
كان ما جاته على ما يشتهي ما جاها
وأحد حلمه كبر مصر بجنته وأهرامه
في دروب المرجلة رجله يحث خطاها