(سيف خالد وساعد خالد بن الوليد)

من هذاك النهار اللي صباحه سعيد
من هذاك الزعيم اللي على العز حافه
قبله الدار غبرا كل حي زهيد
جوع والخوف سايد والمعيشة كسافة
قلّة الأمن خلت كل غايب فقيد
يقتل ابن السبيل أعزل طمع مال تافه
وقبله اللي معه عزه وباسٍ شديد
رافع السيف أبو مقضب وشذرة وحافة
سطوته سيد الأسياد منها يسيد
نزلت مستوى راسه لما طا خفافه
سيف خالد وساعد خالد بن الوليد
سيف ساعد بالاعدا ما يعرف المرافة
لين فضله ومعروفه ملك كل جيد
الله اللي سقى فيه الوطن عن جفافه
أرسله رحمةٍ للخلق رب العبيد
وكل وادٍ عطا واديه واثمر ضفافه
كان قبله نباته بس رمث وهضيد
وانبت أشجار زيتونه وغيد وقوافة
فضل حسنات أبو تركي وربي شهيد
كل كبدٍ تهنت وانتهت كل آفة
طهر أرضه بعزم إخلاص رايٍ سديد
رابطٍ سيرته منهاج نهج الخلافة
حكّم السنة اللي شرعها ما يحيد
حكّم السنة الغرا ووفّى مطافه
وافترش والتحف طاهر ثراها شهيد
وللبطل سجل التاريخ سجل اعترافه
مولد أمة تعيش أيامها أيام عيد
تسهر عيون قادتنا ونكفى الكلافة
كل ما جدّ يوم يجد مجدٍ جديد
من رعاها عطاها كل جهد ونصافة
عاصمة مملكتنا عيد مجدك مديد
كل الأمجاد منك وفيك لاسمك مضافه