فقدتك

فقدتك يوم عيد الله وكلن عايد أحبابه
وأنا مثل اليتيم اللي هموم القلب يخفيها
أشوف الناس فرحانة وكلن حوله أصحابه
وأنا ماني بحاسدها عسى ربي يهنيها
أجامل من يناظرني بضحكة سن كذابه
وأحاول أمسح أدموعي بكف اليد وامحيها
أنا ماني طردت الهم يوم العيد وش جابه؟
أنا ماقلت يانفسي هموم الوقت خليها
وش اللي جدد الذكرى وهمي من فتح بابه؟
أحاول أدفن العبرة لكن الوقت يبديها
أنا لو كان بيديني نسيت الهم وأسبابه
نسيت السالفة لكن تجي لامر طاريها
ذكرت الله وقمت أقرا على نفسي من كتابه
وقمت العن شياطيني وأقول الله يخزيها
تمشيني ظروف الوقت والأقدار غلابه
وأنا مجبور أهوّنها على نفسي وأهديها
أظن الرجل لو يبكي على غاليه ماعابه
وأنا لامن بكت عيني بكت من فقد غاليها
ببكي ياعسى دموعي تلهيني عن غيابه
هلا بالدمع مادامه هموم القلب ينهيها
أحس الكون بي ضايق لو انه ماوسع أقطابه
وأحس إني مللت العيش بالدنيا ولا أبيها
أنا لو ما خشيت الله ولا فكرت بحسابه
لريّح نفسي بنفسي من الدنيا وما فيها