دخيل الله

مادام الشعر تأثيره على عين الحبيب دموع
اجل وش عاد تأثيره على صدري من إبعاده
نظمت الشعر وأدميت الدفاتر والقوافي طوع
من اللي جال فبلاده بعد ما غادر بلاده
أعيش الليل مثل اللي كساه البرد فوق الجوع
وأدوره الدفا وأيضا إلى العاشق مثل زاده
وإلى من غاب عن عيني وعدى للغياب أسبوع
أقول الحب ما حقق معي حقه ولا مراده
أشب له على الطاري شموع وتنطفيه شموع
وتسألني زوايا البيت عن رجوعه وميعاده
وأنا لا من طرأ طاريه أصير العاشق المتبوع
على ذكره إلين الآه صارت داخلي عاده
مواجيبه وسط صدري وفاء من كل شكل ونوع
وفاء كنّه وفاء رجلٍ حفظ مخطوطة أجداده
أهاب الوقت وأخاف الدروب وخاطري مفجوع
إلا سقت القدم يمّه وبعض الناس نقاده
المّ النفس لا ضاقت وأقول إن شوفته مشروع
وأجي له شعب ماجاه الجنون إلى من أسياده
أقول اسمع: يقول آمر ترى صوت الهوى مسموع
أقول الروح منقادة يصيح الروح منقادة
أقول العشق وين أرضه يقول بداخلي مزروع
ولابه واحدٍ غيرك عشقته عشق بزياده
دخيل الله وآمان الله وأنا يالفارع الدلوع
بعدك العمر من عقبّك كرهنا طلّة أعياده
لذا جدد مواعيدك وقلي: والبعْد ممنوع
حرام انك هوى قلبي وتاريخه وميلاده
ولا صار الشعر تأثيره على عين الحبيب دموع
أجل وش عاد تأثيره على صدري من أبعاده