الموت تعب ... كأنه فاضي لنا وعلينا متسلط

أَعْجَبْ ما فيك يا زمن ان العرب هانوا
يوم بعد يوم أصبحوا م الكل يتهانوا
وانت شهيد يا زمن ان العرب أحرار
مجد وكرامة وشرف قال الزمن: كانوا
*
كانوا حقيقي رجال: الكلمة مسموعة
والراية فوق الجبال عالية ومرفوعة
كانت حياتهم مُثُل: أخلاق وجد وْدين
عاشوا الحياة بالأدب والعيبة ممنوعة
*
أصل الشجاعة وأصل التضحية هُمّا
اهل القيم والكرم اهل الفدا لما
يمس ارض العرب طامع في كف تراب
تلقى الاباء والغضب والهمة واللمة
*
نفوس أبيه ما ترضى ظلم او عدوان
وعقول زكيه تراعي حرمة الانسان
بالحب والاحترام كانت لهم قيمة
عرفوا الاصول وبكدة عاشوا سلام وأمان
*
واليوم وطنّا اتسلب هكتار ورا هكتار
ما حد منا وقف يمحي الضنا والعار
قال الكبار م العرب للي وطنهم ضاع
ما تحمدوا ربنا جتْ في الوطن والدار
*
احسن ما تيجي المصيبة في الاهل والأولاد
الشر بره وبعيد وهمّا عنه بعاد
يا ميت مصيبة وأسف دا الموت بيحصدهم
في كل يوم من مدبحة على رؤوس الاشهاد
*
الموت تعب واشتكى نفسه يريح يوم
وشغل يوم عندنا للموت بستين يوم
كأنه فاضي لنا وعلينا متسلط
آخر النهار أهلنا يتشيّعوا بالكوم
*
ما بين شباب اتخطف من كل احلامه
وبنات في عمر الفرح تحت التراب ناموا
حتى الرضيع والصبي والطفل يتقلتوا
والقاتل اللي غدر ما حد يوم لامه
*
الكل ساكت صحيح فالأمر لا يعنيه
بس اللي عاصر فؤادي: الأهل ساكتين ليه
ايه اللي صاب العرب: ايه اللي نسّاهم
أهل وكرامة وشرف واتبهدلوا كده ليه
*
سؤال مهم وخطير يصرخ في كل الناس
العدل فين والضمير يا ناس بلا احساس
حِسّوا وفوقوا بقى دا الذل مالينا
مجد العروبة اتنسى بقى بالمداس ينداس
القاهرة - عبدالفتاح خاطر