رجفة إحساسي

أداري رجفة احساسي إذا مس المشاعر برد
أخافه يلمح أسرار الدفا فعيون إحساسي
اخافه يلمح المعنى.. يميل ويستميل السرد
يسافر في روايات الغرام بليل متناسي
ويرهن للوصل لحظة جنون برمية من نرد
واسلم للرهان وما أجاري غير وسواسي
جفولٍ صنعة اللي حط فتنتها بعين الورد
له بظبي الفلا حلم تفاصيله بمقياسي
أناغي في عيونه لحظةِ تغفل وعينه طرد
طوى فيها الوله أسرار تهزم عزمي وباسي
وفود احساسه اللي طافت بذاك المقام الفرد
ترتّلها الليالي.. ليتها تقرا فكراسي
خردت نجومه بعقد الأماني في سمايا خرد
عسى بعض الأماني تصدف ابراجي وأحداسي
واصد وصاله اللي بينه وبيني حديث الزرد
وهو يدري بغلاه ويدري انه سيد جلاسي
جردت البرد فضلوعي وجرّدني غرامه جرد
وصرت احطب على همس الليالي حارق انفاسي
يشيب الليل بسكاتي ويخجل من نداه الورد
وانا مثلي ومثل الورد.. وهو ذاك الندى القاسي
شاعرة إماراتية