الفكر تايه

البارحه لحظة غروب الشمس في غب البحر
الفكر تايه والمشاكل واصله حبل الوريد
جبت القلم والمحبره والطرس وامعنت النظر
وتداعت افكاري ونادتني هجوسي للقصيد
أخذت من صمت الليالي حزنها بين البشر
ومن لوعة الذكرى بديت اجمع مواجعها واعيد
وأخذت من ديمومة الغيمه وزخات المطر
ومن لهفة الماضي وعبراته ونظرات البعيد
وفي زحمة أفكاري وانا عيني تطاولها السهر
سلمت نفسي للإاله اللي خلق كل العبيد
وآمنت بالمقسوم للإنسان ماعنه مفر
وان البنادم في حياته ياشقي ولا سعيد
تأخذني الذكرى ألم وارجع افكر وافتكر
واجمح عنان النفس ثم أبدأ حياتي من جديد
ولملمت أوراقي مغادر بعد قررت السفر
يكفي حياتي طول هالمده وانا عايش وحيد