خواطر من فوق السحاب

هناء عصام
لما جرنال الوطن يعمل حوار مع زعيم عصابة للتهريب بدل ما يسلمه للشرطة
لما ريهام سعيد تصور مع تجار المخدرات بدل ما تبلغ عنهم
لما عكاشة يذيع معلومات امنية ع الهوا للناس بدل ما يقدمها للامن الوطنى
لما احمد موسى يتفشخر بمعلومات عن محاولة ارهابية لافساد ماتش مصر و السنغال بالتفااااصيل بدل ما يروح للمخابرات
تعرف على طول ان الناس دى كل همهم السبق و الاعلانات و نسب المشاهده على حساب امن بلدهم
ده على كده بقى رأفت الهجان لو كان عايش ف الزمن ده كان زمانه اتصل بالابراشى ع الهوا و خلص!! يا راااجل بلا حبر سرى بلا ورق ف السيفون بلا السيد محسن ممتاز بلا وجع قلب بقى :))
يا لهوى دى المعلومات دلوقتى بقت ارخص م الحرنكش يا جدع !!
معلش يا مصر !!! ليتهم يعلمون ان ف حروب الجيل الرابع المعلومة الواحدة حين يساء استخدامها تصبح اخطر ع الوطن من اصوات القنابل !! ( وهم يعلمون ) !!!
******
فيه ناس كل علاقتهم بالثورة و كل فهمهم عن الثوار انه يشتم و يهاجم و يلبس تى شيرت عليه صورة جيفارا و ينزل يجامل ف اى مظاهرة من اى نوع !! ده ال default بتاع الثائر حاليا !! و اى اختلاف عن كده هيعتبرك مطبلاتى مبرراتى فاسد برجوازى متعفن وهيسمعك م المنقى خيار !! اما لو مرارتك سليمة و حاولت تتناقش هيقوم يسحبك معاه ف اعماق الامعقول و الخيال العلمى و يحكيلك بمزيد من الاثارة و التشويق عن تجربة دولة تيرنداد اند توباكو و ازاى قدرت تيرنداد تبطل التوباكو و تكون انسان جديد !! و لازم تبقى عارف ان اللورد ده هو الوحيد اللى بيفهم و عارف الناس عايزة ايه و البلد ناقصها ايه ...بس هو مش هيقولك عشان سر !! واى محاولة منك انك تسال و تفهم هو عايز ايه هى محاولة فاشلة هتقابل ببصه شرسة و استغراب و احتقار كأنك فتحت عليه بالغلط باب التواليت !!!! طب هل انت مش شايف ان فيه اى محاولات ؟ طب هى كل الناس فاسدة و حرامية ؟ طب هل انت معقد نفسيا من كل الانظمة بشكل عام ؟ طب تحب نجيبلك مين عشان تهدى و تروق و تشوف مستقبلك ؟ طب تعرف الفرق بين النقد و التلاكيك ؟ طب هو جيفارا وهو نازل يثور مع صحابه كان بيلبس تى شيرت عليه صورة مين طاه :))) انسى !! كل واحد عاجبه عقله !! بجد متحاولش !!
إعلامية بالتلفزيون المصري