خواطر من فوق السحاب

هناء عصام
الناس تنزل ف 30/6 و تملى الشوارع بمزاجها و تهتف لمصر.... نبقى شعب عظيم و جبار ....تيجى بقى تنزل الشارع و تقف ف الاشارة و اللى يكبس عليك و اللى يكسر الاشارة و اللى واللى..... نبقى يا ساااتر شعب غتيت و رزل و مفيش اى حضرية !!!!! تروح الانتخابات و تشوف الطوابير و النظام و الناس فرحانة و بتزغرط ...الله الله شوف يا اخى الشعب الجميل ابو دم خفيف والله احنا مفش زينا ... تروح مصلحة حكومية تخلص ورق وتتصدم بالبيروقراطية و تعطيل المراكب و تزاحم الناس على مكاتب الموظفين اللى مش عايزين يخلصونا......اخصصصص عمرنا ما هنتقدم طول ماحنا بالاخلاق دى اعوووذ بالله من ده شعب !!!!!!!تشوف الناس حشدت نفسها بنفسها و جمعت 61 مليار جنيه عشان مشروع القناة ... يا سلاااام والله احنا شعب جبار ملوش كتالوج عظيمة يا مصر بناسك و شعبك والله ....ترجع تمشى ف الشارع و تشوف الزبالة ولا التحرش ولا التعدى على الارض الزراعية ولا البنا المخالف ولا تسمع الشتايم اللى رايحة جايه بين الناس......لا لا لا ايه الجهل ده.. شعب ماينفعش معاه الا هتلر ولا فرعون ييجوا يعلموهم الادب ده ايه القرف ده !!!!!!!!!!! انا بحب الشعب ده ..لا انا بكره الشعب ده ... انا فخور انى م الشعب ده .. يا ريتنى كنت صومالى ... انا بحبه ...انا اكرهه .. الخ الخ ... الله ما ترسلكو على حل يا جدعاااااان !!! يعنى احنا شعب عظيم و فظيع و جبار ولا شعب ابن ستين ؟؟؟
احنا الحقيقة الاتنين و دى قمة البارانويا و الاعجاز العلمى :))) شعب شاف المحتل ..و شاف المختل... اتمرمطنا و افتقرنا و اتجهلنا عن عمد ..لا تعليم يهذبنا ولا دين صحيح يوعينا ولا بيت بميه و نور و سقف يلمنا ....فينا اللى اتغنى بشكل رهيب و فينا اللى مش لا قى ياكل و اندثرت الطبقة الوسطى ... و اختل توازننا و بقت فوضى .... قوانينا مش رادعه و قضائنا مش ناجز .. و بقينا شعب فاقد الامل و بائس ... و هووووووووب جرس انذار ( تيت تيت البلد بتتضيع احذر السيارة ترجع للخلف ) و كأن الاذان اذن و كله وقف صف ... و عملنا احلى سربرايز بارتى لنفسنا !!! طب والله العظيم كلنااااا جنود مصر ... و كلنااا فى رباط ليوم الدين !! و كل جلابية و بدلة و طرحة فيكى يا مصر تحتها وحش ياكل اللى يقرب لمصر ...و حضارة ال7000 سنة مرحتش هدر ... و جدودنا هما هما ولادنا ...شعب عظيم و قوى و جبار و دمه خفيف و ملوش كتالوج !!! ايوا احنا كده و هنفضل كده !!
بس انا طبعا لما انزل دلوقتى غالبا برضه هيطلع عين اهلى و موست بروببلى همسك ف زمارة رقبة الشعب نفررر نفررر و احتمال كبير اندم على كل كلمة كتبتها :))) لكن والله فخورة بانتمائى ليكم و انى جزء منكم !! لا عندى عرق تركى ولا جد جدى شامى مصررررية .....و ليا الشرف.