من خلال قصائد تقطر حزناً ولوعة .. الشعراء يرثون فقيد الوطن نايف الخير يرحمه الله

جسد شعراء وشاعرات حزنهم العميق تجاه رحيل فقيد الوطن سمو ولي العهد صاحب السمو الملكي الأمير نايف بن عبدالعزيز يرحمه الله شعراً من خلال إبداع عدد من القصائد المبكية التي ضمنوها بعض مآثر الفقيد ومنجزاته التي هي أكثر من أن تحصى، وكذلك تعازيهم لأبناء الوطن وأمانيهم للفقيد أن يتغمد الله سموه بالرحمة والمغفرة جزاءً لما قدم طوال مسيرته من خدمات جليلة لدينه ثم مليكه ووطنه.. ندعوكم لمشاركتنا قراءة ما جاء فيها..
(فقد نايف)
شعر - عمري الرحيل
ياشعب اعزيكم على فقد نايف
تبكيه روس وتفرح بغيبته روس
يبكيه امان(ن) يفقده كل خايف
ويبكيه من عنده مروه وناموس
ويفرح به (ارهابي) خبيث الوصايف
اللي على (التفجير) يعطونه دروس
واللي من (التخدير) يمشي مسايف
في كفه (حبوبه) وفي جيبه (الموس)
راح (الجبل) بس العزاء بالنوايف
ترثة (معزي) ترفع بروسها الروس
(الموت حق)
شعر - عيدة الجهني
أحسن الله عزا الشعب السعودي جميع
والله إنا حزانا لكن الموت حق
ما يخلي رفيع ولا يخلي وضيع
وكل قلبٍ لذكر الموت لو صلف رق
هيه ياللي فرحت بموت ليثٍ شجيع
أطف نارك وفي كبدك من الغبن شق
عقب الليث ليثٍ يشبهه بالصنيع
يا محمد ولد نايف على الدرب سق
(للخلد يانايف)
شعر - عبدالله حديجان
لا والله الا مات فكاك النشب
امزبن الخايف ولطام الحريب
ظيغم وله في كل مايحمد سبب
عدل ٍ رحيم ٍ شهم وآوه ٍ منيب
رحيم لكن رحت للأرحم رحب
كريم لكن رحت لكرم منك صيب
عزوا به الحكمه وحكام العرب
مال للعرب في حكمة النايف نصيب
عزوا به الجود وتراحيب الشبب
عزوا الموطن واستجارات الغريب
يامحاربن جهل الضلاله بالحدب
ومحاربن فكر الضلاله بالمصيب
واللي فرح في موت شرواه يعقب
نجمه بعد نجله محمد مايغيب
للخلد يانايف يافكاك النشب
يا امزبن الخايف ولطام الحريب
(البطل مايموت)
شعر- خضران المطيري
مانخاف الموت حنا مؤمنين
والبطل لامات فينا مايموت
بس شوف شكثر يحيى ميتين
من حياة الذل من قهر السكوت
وإلا حنا لو نموت معمرين
مثل نايف منهج بكل البيوت
رجل دوله من عقيدة رجل دين
قطعةٍ من نور للأجيال صوت
فيه عدل وقو باس وفيه لين
شيمة الفرسان للفرسان قوت
للمواطن والوطن حصنٍ حصين
ماتفوت اللي على غيره تفوت
ندعي الله في مصابه قانتين
يرحمه.. في كل محراب وقنوت
الدهاه بكل عصر مخلدين
والوطن دونه نموت ولايموت
(سنة) حزن
شعر- محمد المويعزي
المملكه ياناس تنعي.. اسدها
والشعب لف الحزن (فجعة) وفاته
انشهد انه غاب خيرة.. ولدها
اللي على الخيرات تشهد صلاته
وقلوبنا ياناس يغلي.. نكدها
سلطان مات ونايف (إكد) مماته
السبت موته والصلاة.. بأحدها
وكلٍ يؤكد للخبر في.. قناته
(سنة) حزن وهموم تخفي عمدها
وكل تلحّف في كفنها.. عباته
الله يعظّم أجرنا في.. سندها
يوم الحزن عم البلاد.. وجهاته
(مليون نايف)
شعر - سعود المطيري
نايف اللي حطّ له مليوووون.. نااايف
من وراه اللي.. يّذبون الطويله
يوم غيره: ماعلى مووته حسايف
موتتّة الضرغام.. ماهي بالقليله
علّم اللي بالوغى.. عاارف وشايف
كان ماجانا.. ترى حنّا نجيله
من قديم: وباسنا حد الرهايف
والوطن لو شالنا.. حنّا نشيله
دونكم: بطش وصناديد وكلاااايف
وكلنا: من دوون موطننّا قبيله!!!