قصيدة للشاعر ماجد بن حالي

بعد راح نصف العمر في العلم والتجريب
تعلمّت في مدّة ،،، وجرّبت في مدّة …
•••
يا سامع قصيد الشاعر اللي غزاه الشيب
تفّضل نصايح من ضمير ٍ صفى ودّه …
•••
خذ أبعد مسافة عن حدود الخطا والعيب
ترا إبليس له هجمات خطره ومرتدّه ..
•••
خذ الدين ،، ثم العلم ،، والسلم بالترتيب
وخذ أصحاب ف اللين وخذ أصحاب فالشدّة ..
•••
وتوّقع ترا الرمية مثل ما تصيب ،، تخيب
خذ سلاحك ولد النظر للهدف لدّه ..
•••
ولا تخاوي الا الطيّب اللي يزيدك طيب ..
ولا تنكر المعروف ،، وأتعب على ردّه ..
•••
واذا أخطا رفيقك فأدمح وجنبّه تجنيب
وإذا زاد ،، وألا عاد ،، فالحق لا بدّه ..
•••
جروح القرايب كنها وقع سيف كليب
وجروح العدا تبرى قبل تكمل العدّة ..
•••
وترا الحب ما منه سوى الذل والتعذيب
اذا اشهرت سيفك بالهوى يجرحك حدّه
•••
ولا تقول للي غاب لا جاك ليش تغيب
ولا تلحق المقفي ،، ولو طوّل الصَدّة ..
•••
وضيفك عطه وجه الرضا وأكثر الترحيب
كرم وجه راعي الجود يسبق كرم يدّه ..
•••
لا تبخل بما في الجيب ياتيك ما في الغيب
دروب الفرج والرزق ماهي بمنسدّه ..
•••
ولا تشتكي همك ومن قل ما في الجيب
ترا الناس ،،، كل ٍ وقته إمبيّح ٍ سدّه ..
•••
هذا بعض مما شفت بالعلم والتجريب
تعلمّت في مدّة ،،، وجرّبت في مدّة …
•••
الشاعر ماجد بن حالي