ودك ترمي «البشت»!

أول ما يفكر الواحد يتزوج، يحس بتنميل في قلبه، وعصافير وقلوب حب حمرا تحوم حول راسه، أحلى شي هو أنك تتزوج وتصير زي العالم الثانيين، عندك حرمة تدلعك وتطبخ لك، قبل ما تتزوج تحس أن الرجاجيل اللي يسبون الزواج ويولولون من الهم والغم بسبب زواجهم تحس انهم نصابين، أكيد خايفين من العين أو ناس ما هم مقدرين النعمة اللي عايشين فيها، تقول في قلبك المعصور من كثر العزوبية: معقول يا ربي فيه أحد يشتكي عشان عنده زوجة، ليتني بس أتزوج مستحيل أحس بالنكد وأنا معاي بالبيت زوجة، تقوم الأحلام تتكوم فوق راسك زي الغيم، ودك تصرخ بأعلى صوتك لا بوك تكفى طلبتك زوجني، ولا تزوجت، وانت لابس البشت بقصر الأفراح ودك ترمي البشت وتروح تركض تخم عروستك وتطير، تحرقص بس متى ينتهي العشى ويروح المعازيم، كنك جالس على نار، تراجع بينك وبين نفسك الكلام اللي ودك تقوله لها، تخطط انك وياها تعيشون حب ما قد صار، تك تك، مرت عشرة أعوام من الزواج، تتذكر الناس اللي كنت تكذبهم يوم كانوا يسبون الزواج ودك تروح تحب على كل راس واحد منهم وتتعذر له انك كنت مكذبه، حريمنا يعطونك السعادة بأول سنة ثم تطلع سلبياتها وعقدها ولا يهونون الرجال اللي كانوا أول سنة كنهم عصافير، وانقلبوا بعد كم سنة تماسيح ما ينعاش معهم!