سمعة الطبيب السعودي «ترقل»!

قليل من يثق ان الطبيب عندنا يحرص على صحة الانسان اللي يعالجه، لو تجيهم عندك زكمه شالوا لك البنكرياس، ما يمديك تكمل شكواك للطبيب الا قال لك لازم عملية، صار الكثير من الاطباء ما يفرق عن السمكري بس ان الطبيب يعالج الانسان والسمكري يعالج السيارة، يفحص عليك وهو منشغل باله يفكر كم عملية راح يسوي هالاسبوع، مطامر الاطباء ورا العمليات خلا اكثرالناس تنحاش للطب الشعبي، كله كوم والعمليات القيصرية كوم، شغالين فتح في بطون الحريم ولا حسيب ولا رقيب، اللي نعرفه وحنا ما درسنا طب ان العملية ما يسويها الطبيب الا اذا ما كان فيه مجال عنها، بالذات العمليات القيصرية محتاجة مراجعة من وزارة الصحة وضبطها قبل ما يطلع او يتسرب تقرير سري من وحده من المستشفيات يكشف شي ما يترقع، سمعة الطبيب السعودي محتاجة أحد ذهين يفطن لها ويحاول انه يعالج الوضع بسرعة، لانه بصراحة من كل مية طبيب سعودي يا دوب تلاقي اثنين او ثلاثة محللين رواتبهم ومبريين ذمتهم، ما فيه بطن مواطن سعودي او مواطنة ما مر عليها ساطور طبيب الا شوي ناس بعضهم للحين ما انمرض من فضل الله وبعضهم هج بعمره برا وبعضهم راح لطبيب شعبي، عشانه يوم قارن بين الساطور والاعشاب اختار انه يموت بالاعشاب احسن له، لأن الساطور ما يعطيك فرصة تعرف فيها انك راح تموت، من يخدرونك انت وحظك، لكن الاعشاب حليلة، تعطيك فرصة انك تنسدح على فراش ببيتكم وتنادي على الناس اللي ودك تشوفهم قبل لا تموت وتسلمها لله وانت مالي عينك من شوفة اهلك، الطب اخلاق مو سمكرة سيارات، وعمر الطبيب ما كان همه يجمع قروش، ليت الكثير من الاطباء السعوديين يعرفون هالشي قبل خراب مالطه!
طبعا مو كلهم.. بعضهم!