الاتحاد السعودي لكرة القدم زعلان أن أحد أعضاء مجلس الشورى وصف الدوري عندنا أنه «ممسوخ»، مع أني ما أعرف وش معنى ممسوخ بالضبط، بس أتوقع أنها ذاك الشي اللي ما له معالم ولا ملامح، هي ان بغيتها مسبة تجي، زي لما يقول لك واحد زعلان عليك: يا أحفورة.. ممكن تمشيها وممكن على طول تطمر عليه تضاربه قبل لا تفهم وش تعني المسبة بالضبط أو أترجمها بمخك، اهم شي انه قالها وهو زعلان معناها أنها مسبة، بعض الناس لا جاء يسب وقت الزعل يطلع وصف ما تدري شلون هو قايل، بس ودك الواحد خصوصا إذا كان مسؤول أو في جهة معينة ما يسب بكلمة شوي قاسية وتحتاج ان الواحد يدور وش معناها بالضبط، نخاف نفهم معناه أنه قوي ثم يطلع عادي معناه في اللغة، ونخاف نفهم معناه أنه مو قوي ثم يطلع معناه قوي والا راح وقت الهوشة ولا عاد يمديك ترجع كل شي من جديد، اشين شي بالهوش انك تهاوش واحد يسبك بكلمة ما تعرف وش معناها بس تحس انها مسبة، ودك وانت تضارب تسأله: يا لاخو وش تقصد بكلمتك ذي انا فاهمها بس ابي اتأكد، طبعا لازم تسوي حالك فاهمها، عشان اكثر المضاربات عندنا ما يصير فيها كلام كثير،على طول فعل، واحد لف بالسيارة على واحد واشر له يلبق ثم نزلوا يتراكضون على بعض وبدا محط العقل وراعين السيارات اللي يلبقون، اكثرهم ما يفرعون بينهم لين يشوفون كم لقطة من الهوشة ثم يتدخلون، عضو مجلس الشورى يمكن قال كلمته هذي وهو ما يقصد انها مسبة، زي ما قلنا يمكن قرأ هالكلمة بمكان وحب يقولها من باب التميلح في السب، ترى بعضنا يحب انه يبين روحه مثقف لو في السب فيجيب كلمة ما لها سنع، الاتحاد السعودي رد على كل الكلام اللي قاله مجلس الشورى، رد استخدموا فيه كل قوة حكي يقدرون عليها، بعضه مقنع ومنطقي وبعضه من باب الدفاع عن النفس، أما بالنسبة لكلمة «ممسوخ» المفروض أن عضو مجلس الشورى الله يوفقه انه ما يقولها، عشان ممسوخ ذي سبة مثقفة بس أحسها قوية، يعني ممكن يستخدم عبارة الطف من كذا بكثير تدل على أن الوضع مدحدر زي ما يبي يقول، بس عاد ممسوخ.. هذي سبة جديدة على مجتمعنا، وجديدة على آذاننا، «ممسوخ» يا قلب العنا.. ممسوخ وش ذنبي أنا!! .