الجدار القصير

ما ندري منين نبدا لكم السالفة، الموضوع يحتاج غير السوالف إن الواحد يرسم وهو يسولف عشان تفهمون قوه، لا قالوا الناس ماسكين فلان جدار قصير، يعني كل من جاء يقدر يطمره ولا يعمل له حساب، وكل ما طق عود بعود حطوا الخطأ عليه، وكل ما حاول يفهمهم إنه مظلوم يتوب ويحرم إنهم لو يحطونه بجحر ضب ما عاد يتشكوى، لا تحاول تستقوي نفسك بزعم أني قوي عقب ما يتهيأ لك ترتاح وتتمنى الجدار القصير ولا تحصله، يقولون الذلة أخت المرجلة، إذا حكم عليك القدر إنك جدار قصير خلاص اهجد ولا تزعج العالم واعرف قدرك زين ولا تزعل لا قامت العالم تطامر من فوقك، الجدار القصير مشكلته إنه لو جلس مليون سنة ما راح يقدر يغير من وضعه شيء، وراح يظل جدار قصير لين تقوم الساعة، وانكب الناس المنكوبة هو اللي لقى نفسه جداره قصير، لا تفلسف وتبي تصير قوي، تصير مضحكة للناس زي العرب، الا غصب يصيرون دول كبرى وهم من جنب القدة، العالم العربي يجاكر العالم وهو للحين ما قدر يخترع مشط بدون سنون، ولو قلت له خذ يا عالم يا عربي اعمل لي مشط تهاوشوا مين فيهم ياخذ الفلوس وتلاقيهم كلهم يبون ياخذون الفلوس ولا عندهم استعداد يشتغلون ولو لثانية وحدة، ولا جاء وقت الصحيح والجد يبين أن جدارهم قصير وجدار من طين لو جت سحابة وأمطرت هدت جدارهم وخلتهم يندبون حظهم، مشكلتهم بعد إنك إذا سمعت مهايط الواحد منهم تحسب إنه من الدول العظمى وهو حيالله دولة عالم ثالث يهزمونهم بالريوس!