وش معنى الصين يا وزارة الصحة؟

قبل كم يوم كنت اتبطح قدام المواقع الإخبارية، تجيك لحظات فضاوة بالمخ تتابع أي شي يعرضه التلفزيون بنص تركيز، وحتى لو كنت تتابع بدون تركيز غصب راح تدخل كلمة إنفلونزا الخنازير بمخك غصب، وين ما تطالع سوالف عنها، ولا تدري وش الصحيح، ناس تحذر وتولول، وناس تهون وتضوحك، مرات تحس ان السالفة خطيرة حيل وتقوم بس تحسس خشمك وتجرب تكح يمكن عندك كحة لابده بصدرك وانت ما تدري، وكل شوي تحط قفا يدك على خدك لا يكون فيه حرارة مندسه تحت خدودك وانت مفهي، ما تقلب جريدة والا قناة الا والدنيا مولعه، اكتشفوا لقاح ماكتشفوا لقاح، اللقاح يكفي واللقاح مايكفي، حنا ما عرفنا وقت الخريف الا بعد إنفلونزا الخريف لأنهم يقولون لاجاء الخريف تزيد الحوسة حوستين، الشي اللي نشب بمخي الفاضي وانا ماني فاضي، خبر يقول ان الصين مع ان عدد المصابين فيها بإنفلونزا الخنازير وصل إلى 11722 مصاب بس إلى الحين ما مات عندهم ولا واحد، وحنا المصابين عندنا مايجي ولاربع المصابين عندهم والمتوفين عد واغلط، كل يوم يزيد اكثر من نص دول العالم، لايجي احد ويقول لي: عشان الصينيين خشومهم صغار، السالفة محتاجة تبحلق اكثر بالموضوع، الناس بهالموضوع ما لهم دخل، لان السالفة بعد الاصابة، يعني المصابين بالمرض في الصين أضعاف المصابين عندنا، ليش ماعندهم حالة وفاة؟ صح الاعمار بيد الله، صح كل شي مقدر ومكتوب، بس حنا نتكلم عن الاخذ بالاسباب، نتكلم عن جاهزية وزارة الصحة عندنا في معالجة المفلوزين، حنا صح ما نعرف بهالسوالف، بس نعرف نقارن بيننا وبين غيرنا من الناس اللي عايشه معنا على كوكب الأرض!