أبو 3 محاور

شرايكم شباب نسمي مدرب منتخبنا بيسيرو (أبو ثلاث محاور)، عشانه الله يصلحه ما يعرف يلعب ولا يكيف راسه الا اذا رص ثلاث محاور ورى وخلاهم مثل البعارين الهاملة اللي تهابد على عماها، يتراكضون وكل شوي يبون يدقون بروس بعض، اليوم مباراتنا قدام منتخب البحرين، واتوقع والله العالم ان شبابنا راح يعطون انفلونزا الخنازير على راسها ويحضرون لين يقفل الملعب من كثر الجمهور، حنا يا بيسيرو راح نحضر ونسوي اللي علينا ونبي نشوف وش تسوي انت ومحاورك الثلاث، ما نقول انك ما تعرف تدرب، بس سالفة انك تقول اني ما انهزمت هذا ما توكل عيش اذا ما تأهلنا وانا اخوك يا بيسيرو، انتم ياها الاجانب ما تدربون زين الا اذا خلينا الجوهر يحوم حولكم، عشان تعرفون ان كرشتكم قريبة اذا ما دربتوا زين، الليلة بصراحة ودنا نتبطح على السحور وحنا فايزين، وش فيها؟ من حقنا يااخي نتونس شوي، نبي نتأهل لكاس العالم، وبعدين يحلها حلال، على الاقل نتفرج على حفل افتتاح كاس العالم وحنا رازين حالنا مع المنتخبات الستطعش المتأهلة، وبعدين حتى لو امطرونا بعشرين هدف كل مباراة مو مشكلة، اشتقنا لكرنفالات كاس العالم، ودنا نسمع كلمة سأوديا اريبيا بالانجليزي، ونشوف علمنا الاخضر يدخل وكل سكان الكرة الارضية تتفرج عليه، تكفى يا بيسيرو فكنا من سالفة 3 محاور، وحط كل لاعب بمركزه، وخلنا ننام مرتاحين، تراك غثيتنا بسالفة: يكفي اني ما انهزمت!