التميلح!

فيه ظاهرة يمكن ما هي موجودة بغير السعودية، وهي ظاهرة التميلح، المشكلة اني مدري شلون اشرحها لكم عشان تدخل مخكم بسرعه بدون ما احتاج لسبوره، ماحب اشرح على السبورة وارسم واشخبط، ودك الواحد لا شرح شي ما يقول غير كلمتين ثم ينفهم على طول، التميلح هو انك تسوي شغلات عشان تعجب اللي قدامك، وهالظاهرة تحتاج مهارة خاصة عشان ما تنكشف انك تميلح ثم تنقلب السالفة ضدك، يعني مثلا لا صار الواحد شاري ساعة جديدة بكم الف ويبي يوري الناس انه شاري ساعه ماركة يقوم يسولف ويحرك يده اليسار عشان تطلع الساعة وكنه مو قاصد، أهم شي ان الواحد ينتبه انه لا يكثر التميلح قدام مديره بالعمل، عشان ما تلاقي نفسك بيوم من الايام ماسك الباب، يعني لا تحاول تخم كم ورقة وتدخل على مديرك بزعم انك فاهم وحريص على العمل، أخاف يرجك مديرك بكم سؤال عن الموضوع اللي انت تميلح فيه ويكشف ان ما عندك سالفة، اكثر تميلح للسعوديين ممكن تشوفه وتنبطح على بطنك من الضحك برا السعودية وخصوصا ايام الصيف، وخصوصا خصوصا بشارع مثل السوليدير او الشانزليزيه (مانت هين يالاوروبي)، تشوف اشكال وانواع من التميلح تفطس من الضحك، تشوف واحد لابس بدلة بشي وشويات ومتسمر كنه خيال المآته عشان خايف يتحرك واجد بعدين تتعفط البدلة، وواحد ثاني حاط رجل على رجل بزعمه انه مهم وملفت الانظار وساقه طالع كنه داخل يمشي في سيل وخايف يتبلل، والثالث حاط البلاك بيري على طرف الطاوله كنه ما يقصد بزعم شوفوني عندي بلاك بيري، عاد الرابع اللي ما معه طب هو اللي غاز راسه بشاشة جواله وشغال بلوتوث، مو مشكلة نتسلف، نتبهدل، ناكل هوى، نفقد احترامنا لانفسنا، أهم شي نتميلح ونعجب اللي قدامنا!