(زكمة) الخنازير!

فيه حيوانات خايسه ما ودك حتى تلمسهم لمس، كيف عاد لو جاك مرض منهم الله يعافي الجميع، تخيل شكلك لاقالوا لك: اصفط على جنب ياأخ ولبق بجنب الكاميرا الحرارية عشانها لقطتك وعندك حرارة مسرعة ماوقفت عند الإشارة، ثم قاموا يبحلقون فيك ويتراكضون يمين ويسار، عشان ربعنا يحبون التهاويل، اللي يلبس كمام، واللي يحط يده على خشمه، واللي يكلمك وهو معطيك ظهره، واللي تشوف ركبه تصافق وهو يكلمك، خير يا أخوان علموني وش فيني؟ ولا أحد يرد عليك، الكل منشغل بنفسه، وتحس انهم راح يرسلونك لريس الامم المتحدة مخفور بس منحرجين من اهلك، تحس ان ودهم يرمونك باقرب زباله – الله يكرم الجميع – يا أخوان خير؟ علموني وش فيني؟ وعمك اطرش ولاجابوا خبرك، عازلينك ومقفلين عليك ويعطونك اكلك من ورى الباب وينحاشون، وبعد ما تنشف كل قطرة دم فيك يقولون لك اكتشفنا ان عندك إنفلونزا خنازير، طيب؟ وش الدبرة؟ ابد سلامتك راح تجلس عندنا كم يوم لين تبرى وتروح لأهلك، انت ماتحس بشي اكثر من اللي تحسه لاجتك زكمة، ولاصرت متروش ولفحك الهوى تجيك اعراض زكمة اقوى من هاللي صاجينا فيها، ياأخى ودك الواحد اذا انزكم من لفح الهوى يطلعون خبره بالجرايد، ويصير عندنا انفلونزا (الرخوم) اللي تجي من لفح الهوى، عشانها العن مليون مرة من انفلونزا الخنازير اللي مهولين سالفتها وآخر شي تكتشف انها تبرى لحالها ولاتحتاج علاج، وان بغيت تدلع نفسك تاخذ حبوب حقت شركة دخلت مليارات من ورى كذبة انفلونزا الخنازير!