الملحق أحسن من (البدروم)!

يا طمعكم طمعاه يا جمهور الكورة، تبون غصب تروحون لكاس العالم وحاضرين من الظهر للملعب ومعكم اعلامكم ومجهزين شرطان الأغاني تبون تفلونها بعد المباراة وتنشفون حلوق الدوريات مطارد وراكم بالشوارع، تحسبون ان منتخبكم يشق كوريا بثلاثة والا اربعة اهداف، حاطين ببالكم ان كوريا الشمالية فريق ضعيف ويقدر منتخبنا يغفصه بيد وحده، ما تدرون ان المنتخبات الثانية تتطور كل شهر احسن من الشهر اللي قبله، وحنا المنتخب الوحيد في المجرة الشمسية محلك راوح، بعد عشرين سنة راح يجون احفادكم ويلاقون الوضع زي ما هو، ياسر بالهجوم والشلهوب لازم يلعب ونور لازم يفر نص اللي قدامه ونامي لازم يكون بالتشكيلة حتى لو ما لعب عشان بيسيرو ذال لا يقولون عنه الناس انه يطيع الصحافة، وشوله صرف هالملايين دام ربعنا بس يروحون لكاس العالم يسنترون ويرجعون، لا تزعلون من يونس محمود انه قال حنا احسن من منتخبات ثانية تلقم بالثمانية، هذا الصحيح، جاوبوني حنا ماعطتنا المانيا ثمانية مع الرحمة، لا ومن زين الطبايع الجوهر بعد هدف المانيا الخامس مطبب عبدالله الجمعان يسمع بتقليص الفارق، خلونا من المهايط اللي ماله سنع، لازم نقبل بالواقع، ماحنا حول العالمية وتفكيرنا للحين زي ما هو، وحتى ان هزمنا البحرين ونيوزيلندا ورحنا لجنوب افريقيا، ماضنتي ربعنا عندهم دبره، وراح تكون قلوبنا ترقع خوف من ثمانية جديدة، اللي شاف مصر والعراق وش سووا ببطولة القارات يتحسر على وضع ربعنا المدحدر، بس عاد الشكوى لله، مهما صار ودنا ان منتخبنا يتأهل لجنوب افريقيا، على الأقل لاعبينا يلقونها فرصة يتفرجون على حديقة سفاري ويشوفون الزرافات اللي ما كانوا يشوفونها الا بكتاب العلوم!