(المشكلجية)!

كثير من الناس يعرف وش هو من لحية بس يتجاهل حقيقته؛ لأن التغيير يحتاج ناس عايشة في مجتمع منظم مو مجتمع خبصة زي مجتمعنا، كثير من الناس يعرف إنه شلاخ وياما سمعوه ناس في وجهه إنه آدمي كذوب بس مطنش ومستمر يكذب بكل قواية وجه، وبعضهم يدري إن الناس تدري إنه إنسان سروق ولا يحلل ولا يحرم بس الأخ مطنش ولا جاب خبر أحد، كل نوع ممكن تلاقي له سبب أو مبرر حتى لو مبرر أي كلام، إلا نوع من الناس مدري كيف قايل هو نوع يسمى (المشكلجية) اللي لا رحت انت وياه تلقى حالك ثاني يوم لازم تمر قسم الشرطة عشان اللي هاوشهم خويك (المشكلجي) متهمينك انك تسوي حالك تحجز أو تفرع بينهم وانت تقضبهم لخويك عشان يدبج فيهم زين، المشكلجية مثل المرضى النفسيين الله يعافينا عندهم تنسيم بالمخ، ومستحيل يعترف إنه مشكلجي ويدور المشاكل على روس الشجر، ومستحيل تلاقي مشكلجي يقتنع في غير رايه، ومن تفتح الموضوع معاه غير يقلب عليك ويطلعك جاهل ما تعرف وش معنى الشجاعة، نص الحوادث والزحمات بسبب مزاج المشكلجية وحبهم للهواش وتفهيم العالم الصح، المشكلجي لا مشيت معه في أي مكان يدك على قلبك، ليش؟ لأنك ما تعودت وهو ما تفرق معاه ومتعود وتلاقيه يعرف نص موظفين السجون والشرطة من كثر ما تردد عليهم واللي ما يعرفه منهم بالاسم يعرفه بالوجه!